Foto: Zakon.kz
Qazaqstan Úkimeti Qoja Ahmet Iasaýi murasyn ilgeriletý jáne nasihattaýǵa arnalǵan 2026–2028 jyldarǵa arnalǵan is-qimyl josparyn bekitti. Tiisti qaýlyǵa Premer-ministr Oljas Bektenov qol qoiǵan, dep habarlaidy Ult.kz.
Qujatta uly oishyldyń murasyn zertteý, saqtaý jáne keńinen tanytý, sondai-aq Túrkistan qalasyn rýhani týrizmniń negizgi ortalyqtarynyń birine ainaldyrýǵa baǵyttalǵan 37 is-shara qamtylǵan.
Jospar bes negizgi baǵytty qamtidy: institýtsionaldyq jáne quqyqtyq bazany jetildirý, ǵylymi-zertteý jáne bilim berý, mádeni-aǵartýshylyq jáne shyǵarmashylyq jobalar, aqparattyq-imidjdik jáne halyqaralyq is-sharalar, sondai-aq qalpyna keltirý jumystary.
Atap aitqanda, jastar men oqýshylarǵa erekshe kóńil bólinip otyr. Túrkistanda «Iasaýitaný» baiqaýynyń respýblikalyq kezeńin ótkizý jáne mýzei janynan arnaiy klýb ashý josparlanǵan.
Sonymen qatar, Qoja Ahmet Iasaýidiń shyǵarmalary men ǵylymi eńbekterin basyp shyǵarý, onyń murasyn otandyq jáne sheteldik arhivterden izdestirý, qujattar katalogin ázirleý kózdelgen.
Týrizmdi damytý maqsatynda sheteldik qonaqtarǵa arnalǵan jańa marshrýttar ázirleý, gaidbýktar, beinerolikter men aýdiogidterdi jańartý, sondai-aq kesenede ǵylymi-restavratsiialyq jumystar júrgizý josparlanyp otyr.
Budan bólek, IýNESKO-nyń «Álem jady» baǵdarlamasy aiasynda Iasaýi murasyn nasihattaý, sondai-aq halyqaralyq deńgeide arnaiy mádeni kúnder jariialaý máselesi qarastyrylmaq.
Jospardy júzege asyrý Iasaýi murasyn saqtaý men zertteý jumystaryn keńeitip, ony el ishinde jáne shetelde keńinen tanytýǵa, sondai-aq Túrkistannyń rýhani, mádeni jáne týristik áleýetin arttyrýǵa múmkindik beredi.
