QR Premer-Ministri Asqar Maminniń tóraǵalyǵymen ótken Úkimet otyrysynda Qazaqstanda koronavirýstyq infektsiianyń taralýyna jol bermeý sharalary qaraldy, dep habarlaidy "Ult aqparat" primeminister.kz saityna silteme jasap.
Aǵymdaǵy jaǵdai men atqarylyp jatqan jumystar týraly QR densaýlyq saqtaý ministri E. Birtanov pen QR syrtqy ister ministri M. Tileýberdi baiandady.
Qazaqstanda koronavirýstyq infektsiia jaǵdailary tirkelmegen. QR-da JRVI simptomdary men joǵary temperatýrasy bar 134 adam aýrýhanaǵa jatqyzyldy, olardyń 106-sy saýyǵyp shyqty, 28-i ázirge statsionarlarda emdelýde. Naýqastardyń jaǵdaiy qanaǵattanarlyq.
Meditsinalyq uiymdar turǵylyqty jeri boiynsha Qytaidan kelgen azamattardyń densaýlyǵyn monitoringileý boiynsha jumysty jalǵastyrýda, 24 167 adam qamtyldy, onyń ishinde 1298-i – shetel azamattary. Sońǵy 14 kún ishinde QHR-dan kelgen 8 851 adam meditsinalyq baqylaýǵa alynǵan, qalǵan 15 316-sy inkýbatsiialyq kezeńniń aiaqtalýyna bailanysty monitoringten shyǵaryldy.
Ortalyq referens-zerthana bazasynda Asa qaýipti infektsiialar ulttyq ortalyǵy Ulttyq biotehnologiia ortalyǵymen birlesip, koronavirýsty jedel diagnostikalaýǵa múmkindik beretin diagnostikalyq júieni ázirledi. Halyqaralyq yntymaqtastyq aiasynda Rospotrebnadzordan 2000 zertteýge diagnostikalyq júieler alyndy jáne QHR-dan 5000 zertteýge satyp alyndy.
Búginde QHR aýmaǵynda 497 QR azamaty bar, olardyń 337-si stýdentter. Biylǵy 10 aqpannan 11 aqpanǵa deiin QR 217 azamaty «Eir Astana» áýe kompaniiasynyń charterlik ushaǵymen Beijiń qalasynan Nur-Sultan qalasyna jetkizildi. Osy jyldyń 12 aqpanynda QHR-dan QR 155 azamatyn osyndai reispen shyǵarý josparlanǵan. Azamattardy elge evakýatsiialaý jumystary aiaqtalǵannan keiin QHR aýmaǵynda Qytaida qalýǵa niet bildirgen QR 343 azamaty qalady.
Premer-Ministr Memleket basshysy Qasym-Jomart Toqaevtyń tapsyrmasyna sáikes Úkimet Qazaqstanda koronavirýstyq infektsiianyń taralýyna jol bermeý boiynsha barlyq qajetti sharalardy qabyldap jatqanyn atap ótti.
«Búgingi tańda Qazaqstan aýmaǵynda koronavirýspen aýyratyndar tirkelmegen. Jaǵdai turaqty jáne Úkimettiń turaqty baqylaýynda», — dedi A. Mamin.
Úkimet basshysy Densaýlyq saqtaý ministrligine sanitarlyq-epidemiologiialyq baqylaý jumystaryn jalǵastyrýdy, Syrtqy ister ministrligine QHR-daǵy qazaqstandyqtarmen tyǵyz bailanys ornatyp, olarǵa qajetti kómek kórsetýdi tapsyrdy.
Premer-Ministr monopoliiaǵa qarsy organdar men Densaýlyq saqtaý ministrliginiń nazaryn dárihana jelilerindegi meditsinalyq maskalar men virýsqa qarsy preparattarǵa baǵany jasandy kóterýdiń jekelegen faktilerine aýdardy.
«Máseleniń mán-jaiyn anyqtańyzdar. Jalpy, Densaýlyq saqtaý ministrligi men óńirlerdiń ákimderi jaǵdaidy turaqty baqylaýda ustaýy kerek», — dep túiindedi A. Mamin.
