Oqý-aǵartý ministri Ashat Aimaǵambetov oqý jylynyń uzartylýyna qatysty pikir bildirdi, - dep habarlaidy Tengrinews.kz agenttigi.
Ministrdiń aitýynsha, jergilikti atqarýshy organdarmen birlesip, jańa oqý jylyna daiyndyq jumystary júrgizilip jatyr.
"3,6 million oqýshyny qamtityn 7 637 mektep bar. Oqý jyly 1 qyrkúiekte bastalady, uzaqtyǵy - 36 apta, iaǵni jaz mezgili balalar kanikýly bolady", - dedi Aimaǵambetov Úkimet otyrysynda.
Ol bilim berý salasyndaǵy kóshbasshy eldermen salystyrǵanda, Qazaqstanda jazǵy kanikýl eń uzaq ekenin aitty.
"Demalys jáne mereke kúnderimen qosa balalar jyl boiy 192 kún demalady, al 173 - bir jyldaǵy oqý kúnderiniń sany. Biz zertteý jáne taldaý júrgizdik jáne birinshi synyp oqýshylarynyń úsh tildi meńgerýi qiyn ekenin kórdik, sondyqtan ekinshi jáne úshinshi tildi meńgerý úshin bala eń aldymen óz ana tilinde oqyp, jazýdy úirenýi kerek degen sheshimge keldik", - dedi vedomstvo basshysy.
Osylaisha, memlekettik tilde oqytatyn mektepterde birinshi synyptan bastap balalar tek qazaq tilin, ekinshi synyptan bastap orys tilin oqýdy bastaidy.
"Barlyq mektepte úshinshi synyptan bastap oqýshylar aǵylshyn tilin meńgeredi. Sonymen qatar, balalardy eńbekke baýlý maqsatynda birinshi synyptan bastap "eńbekke baýlý" jáne "beineleý óneri" pánderi engiziledi", - dedi ministr.
Premer-ministr oqý jylynyń uzarýynan qandai nátije kútiletinin surady.
"Bul bir jaǵynan oqýshylarǵa túsetin júktemeni azaitsa, ekinshi jaǵynan oqý protsesi 31 mamyrda aiaqtalady. 1,5 million bala bes kúndik oqý aptasyna óte almady. Endi bizde qosymsha 36 kún kanikýl bolady, balalar ony óz qalaýynsha paidalana alady. 100-den asa mektepte úsh aýysymda jumys isteý qaýpi boldy. Degenmen, innovatsiialardyń kelýimen olar eki aýysymda jumys isteitin bolady", - dep jaýap berdi Aimaǵambetov.
Sóz sońynda oqý-aǵartý ministri engizilgen ózgerister arqasynda 1,5 million balada 36 kún qosymsha demalý múmkindigi bolatynyn basa aitty. Premer-ministr bul usynystardy Úkimet qoldaitynyn málimdedi.
