Qazaqstan Úkimeti el aýmaǵyna sheteldik avtomobilderdi ákelýdi shekteýge baǵyttalǵan tetikter ázirlep jatyr. Bul jaiynda Senat depýtattarynyń saýalyna QR Premer-Ministri Álihan Smaiylovtyń jaýabynda aitylǵan, dep habarlaidy QazAqparat.
«Salyq zańnamasyna sáikes tirkemelerdi qospaǵanda, Qazaqstan Respýblikasynda tirkelgen jáne (nemese) esepte turǵan kólik quraldary kólik quraldaryna salyq salý obektileri bolyp sanalady. Osylaisha, shetelden kelgen kólik quraldaryn esepke qoiý máselesi kezek kúttirmeitin másele bolyp tabylady dep esepteimiz», - dedi Úkimet basshysy jaýabynda.
Osy oraida Álihan Smaiylov Úkimet el aýmaǵyna sheteldik avtomobilderdi ákelýdi jáne paidalanýdy shekteýge baǵyttalǵan tetikterdi ázirleý jáne basqa da ilespe máseleler boiynsha jumys júrgizip jatqanyn atap ótedi.
«Osyǵan bailanysty kórshi elderden (Resei, Armeniia, Grýziia, Qyrǵyzstan) kelgen avtokólik quraldaryna tolyq resimdelgenge deiin sol jerde ýaqytsha tirkei otyryp salyq salý máselesin qarastyrýdy mezgilinen buryn dep sanaimyz», - dedi ol.
