Memleket basshysy Qasym-Jomart Toqaev Úkimetke ekonomikanyń shyǵarmashylyq sektoryn damytý boiynsha sharalar keshenin ázirleýdi tapsyrǵan bolatyn. Osy másele boiynsha QR Premer-Ministriniń birinshi orynbasary Álihan Smaiylovtyń tóraǵalyǵymen salalyq ministrlikterdiń jáne ákimdikterdiń qatysýymen jumys keńesi ótti, dep habarlaidy "Ult aqparat".
Qosymsha quny shyǵarmashylyq qyzmet pen ziiatkerlik menshik quqyqtaryn basqarý (kino, mýzyka, jarnama, BAQ, dizain, sáýlet, kibersport, sán, zamanaýi óner jáne t.b.) arqyly qalyptasatyn shyǵarmashylyq salalar búginde eń tanymal jáne ekonomikanyń serpindi damyp kele jatqan baǵyttarynyń biri sanalady. Qazirdiń ózinde ekonomikanyń bul bóligi álemdik JIÓ-niń 3 paiyzdan astamyn quraidy (2,6 trln AQSh dollary).
Barǵan saiyn qazaqstandyqtar halyqaralyq naryqta joǵary suranysqa ie kreativti ónim jasai alatyndyǵyn kórsetýde. Bizdiń azamattarymyzdyń mýzyka, kino rejissýrasy jáne oiyn-saýyq media-kontentin qurý siiaqty salalarda (2019 jyly Qazaqstannyń shyǵarmashylyq indýstriialarynyń eksport kólemi 247 million AQSh dollarynan asty) erekshe jetistikteri bar.
Kezdesýge qatysýshylar shyǵarmashylyq sektordy damytýdyń joǵary áleýetin eskere otyryp, Qazaqstan shet elderdiń úlgisimen, shyǵarmashylyq salalarǵa jáne tutastai alǵanda ekonomikanyń barlyq salalaryna qatysty memlekettik saiasattyń maqsattaryn, mindetterin, tetikterin jáne kútiletin nátijelerin beineleitin ajyramas strategiialyq qujat ázirleýi qajet ekenin atap ótti.
Eldegi ekonomikanyń shyǵarmashylyq sektoryn damytý úshin qazaqstandyqtar arasynda shyǵarmashylyq belsendilikti yntalandyrýǵa, talanttardy tiimdi basqarýǵa, sondai-aq shyǵarmashylyq kásipkerlikti damytýǵa jáne sheteldik investitsiialardy tartýǵa jaǵdai jasaýǵa baǵyttalǵan birqatar sharalar usynyldy.
«Memlekettik organdardyń barlyq usynystary muqiiat zerdeleýdi jáne kásibi qoǵamdastyqpen talqylaýdy qajet etedi. Memleket basshysy alǵa qoiǵan shyǵarmashylyq ekonomikany damytý jónindegi tapsyrmalardy sapaly oryndaý úshin Premer-Ministr A.U.Maminniń tapsyrmasy boiynsha kún saiyn osy mańyzdy jumystarmen ainalysatyn arnaiy Jobalyq keńse qurylyp jatyr. Shyǵarmashylyq sektordyń bizdiń elde tek ekonomika úshin ǵana emes, sonymen birge qazaqstandyq mádenietti nasihattaýda, jastardyń ózin-ózi tanýynda orasan zor damý áleýeti bar ekenin erekshe atap ótkim keledi. Úkimet osy strategiialyq mańyzdy salany damytý úshin barlyq kúsh-jigerin salady», - dedi Álihan Smaiylov.
