QR Premer-Ministri Asqar Maminniń tóraǵalyǵymen ótken Úkimettiń selektorlyq otyrysynda 2020 jyldyń sońyna deiin ekonomikalyq ósimdi qalpyna keltirý jónindegi keshendi jospar qaraldy.
Onlain formattaǵy jiynda Ulttyq ekonomika ministri R. Dálenov, Qazaqstan et-sút odaǵy qaýymdastyǵynyń basqarma tóraǵasy I. Saýer, «Qazaqstan kásipkerleriniń forýmy» Qaýymdastyǵy Keńesiniń tóraǵasy R. Batalov, Qazaqstan mashina jasaýshylary odaǵynyń tóraǵasy M. Pishembaev, «KazakhmysCopper» basqarmasynyń tóraǵasy B. Qyryqpyshev, «Atameken» UKP tóraǵasy A. Myrzahmetov baiandama jasady, dep habarlaidy "Ult aqparat" primeminister.kz saityna silteme jasap.
Keshendi jospar 10 baǵyttan jáne iskerlik belsendilikti yntalandyrý, jumyspen qamtýdy qoldaý jáne halyqtyń tabysyn arttyrý jónindegi 172 júieli ári salalyq sharalardan turady. Qujat jobasyn barlyq múddeli taraptar jáne biznes-qoǵamdastyq, onyń ishinde «Atameken» ulttyq kásipkerler palatasy men salalyq biznes qaýymdastyqtar egjei-tegjeili talqylap, maquldaǵan.
«Keshendi jospardy iske asyrý syrtqy orta tigizetin keleńsiz áserdi barynsha azaitýǵa, asa mańyzdy salalardyń bárin jáne otandyq biznes qyzmetin jandandyrý boiynsha praktikalyq is-sharalardy qamtýy tiis», — dedi A. Mamin.
Usynylyp otyrǵan sharalar qarjylandyrý jáne jeńildikti nesie berý tetikterin, onyń ishinde mikrobiznes tetikterin edáýir keńeitýdi, eksporttyq shyǵyndardy kepildendirý jáne óteý quraldaryn belsendi túrde qoldanýdy kózdeidi. Forvardtyq jáne uzaq merzimdi offteik-kelisimsharttar jasasý praktikasy engiziledi. Júkteme azaiady jáne salyqtyq ákimshilendirý jeńildetiledi, salyqtar men qaryzdar boiynsha preferentsiialar men tólemdi keiinge qaldyrý qoldanylady, jekelegen aiyppuldar men alymdar alynyp tastalady, ákimshilik kedergiler azaitylady.
Turǵyn úi qurylysy naryǵynda suranysty yntalandyrýdyń, otandyq óndiristi jáne qyzmet kórsetý salasyn qoldaýdyń jańa tásilderi engiziledi.
«Jalpy, Keshendi josparda kózdelgen sharalar birqatar salanyń belsendiligin qalpyna keltirýge múmkindik beredi. Bul salalarda 6 mln-nan asa adam jumyspen qamtylǵan», — dedi A. Mamin.
Úkimet basshysy memlekettik organdardyń birinshi basshylaryna, óńirler ákimderine Jospardyń is-sharalaryn belgilengen merzimde sapaly túrde iske asyrýdy qamtamasyz etýdi tapsyrdy.
«Memleket basshysynyń tapsyrmasy boiynsha álemdik jáne ulttyq ekonomikadaǵy jaǵdaidyń kúrt ózgerýine bailanysty 2025 jylǵa deiingi strategiialyq damý jospary jańa redaktsiiada ázirlenedi. Ol institýtsionaldyq jáne qurylymdyq reformalardy júrgizýdi qamtityn eldiń orta merzimdi kezeńge arnalǵan jańa ekonomikalyq baǵytynyń negizgi baǵyttaryn aiqyndaidy», — dep A. Mamin, osy jyldyń 1 shildesine deiin qujattyń jańa redaktsiiadaǵy jobasyn ázirleýdi tapsyrdy.
