Úkimet basshysy Asqar Mamin eldegi ekologiialyq ahýaldyń nasharlaýyna bailanysty densaýlyq saqtaý salasyna jumsalatyn shyǵystar ulǵaiyp bara jatqanyn málim etti, dep habarlaidy QazAqparat.
«Elimizdegi ekologiialyq jaǵdaidy jaqsartý – QR Tuńǵysh Prezidenti - Elbasy Nursultan Nazarbaev pen Prezident Qasym-Jomart Toqaevtyń aldymyza qoiǵan asa mańyzdy mindetteriniń biri. Jyl saiyn ekologiialyq qaýipsizdik máseleleri ózekti bola túsýde. Atmosferaǵa shyǵarylatyn shyǵaryndylar adamdardyń densaýlyǵyna ǵana emes, ekonomikaǵa da áser etedi. Densaýlyq saqtaý salasyna jumsalatyn shyǵystar ulǵaiyp, eńbek ónimdiligi tómendeýde. Qazaqstanda keiingi 4 jylda atmosferaǵa tastalatyn lastaýshy shyǵaryndylar kólemi 13 paiyzǵa ósti. Iri qalalarda aýanyń lastanýyna áser etetin negizgi faktor – avtokólik», - dedi Asqar Mamin Úkimet otyrysynda.
Premer-ministrdiń aitýynsha, mysaly Almaty qalasynda atmosferaǵa shyǵarylatyn barlyq shyǵaryndylardyń 65 paiyzy – avtokólikterge tiesili.
«Biz qorshaǵan ortany barynsha saqtap qalýymyz kerek. Balamaly energetikany damytyp, qaldyqtardy basqarý máselelerin pysyqtaý qajet», - dedi ol.
Eske sala ketsek, buǵan deiin QR Ekologiia, geologiia jáne tabiǵi resýrstar ministri Maǵzum Myrzaǵaliev tiisti shara qabyldanbasa, 2030 jyly boljam boiynsha lastaýshy zattardyń emissiiasy 3,6 mln tonnaǵa deiin ósetinin boljaǵan edi.
