2019 úkimettik emes uiymdardyń áleýmettik jobalaryn memleket tarapynan qarjylandyrý aiasynda 3.4 mlrd teńgege 128 joba júzege asyrylǵan. Bul týraly "Azamattyq bastamalardy qoldaý ortalyǵynyń" uiymdastyrýymen ótken sharada QR Aqparat jáne qoǵamdyq damý vitse-ministri Daniiar Esin málim etti, dep habarlady "Ult aqparat".
"Azamattyq bastamalardy qoldaý ortalyǵy" 2019 jyly istelgen jumystar men júzege asqan jobalardy, qabyldanǵan sharalardy qorytyndylap otyr. Biyl granttyq qarjylandyrý aiasynda jalpy 3,4 mlrd teńgege ÚEU 128 joba júzege asyryldy. Bul jobalardyń barlyǵy áleýmettik mańyzy bar salalar boiynsha, atap aitqanda jastarǵa qolaily orta qalyptastyrý, erekshe balalarǵa jaǵdai jasaý, sýitsidtiń aldyn alý sharalaryn júrgizý, úkimettik emes sektor men volonterlik qyzmetti damytý máselelerin qamtydy. Jastar jyly bolǵandyqtan, negizgi 37 joba jastar saiasatyna qatysty boldy. Olardyń qatarynda jastarǵa quqyqtyq kómek kórsetý, otbasy qundylyqtaryn saqtaý jáne nasihattaý, jastar arasyndaǵy ajyrasýdyń aldyn alý bar. Búgingi sharaǵa osy qyzmetterdi alýyshalar men grant utyp alǵandardy shaqyrdyq", - dedi vitse-ministr.
Onyń aitýynsha, bul jobalardy júzege asyrýǵa 98 úkimettik emes uiym qatysqan. Al olar aimaqtardaǵy 1000-nan astam úkimettik emes uiymdardy atalǵan jobalardy elimizdiń túkpir-túkpirinde iske asyrýǵa tartqan. Sonymen qatar ol keler jyly "Eriktiler jylyna" bailanysty volonterlik salaǵa qatysy bar jobalarǵa basa nazar aýdarylatynyn atap ótti.
Sondai-aq atalǵan is-sharaǵa memlekettik organdardyń, halyqaralyq jáne úkimettik emes uiymdardyń ókilderi, grant alýshylar men jobalardyń benefitsiarlary qatysty. Sondai bir grant alýshylardyń jumysyn úilestirýshi Atyraý oblysy "Azamattyq Aliansy" zańdy tulǵalar birlestiginiń ókili Gúlnáfis Jarmuhanbetova aimaqtaǵy júzege asqan áleýmettik jobalarǵa toqtaldy. Onyń aitýynsha, alǵashqyda oblystyń barlyq aýdanynan 400-den astam joba kelip túsken.
"Atyraý oblysy "Azamattyq Aliansy" zańdy tulǵalar birlestigi 2019 jyldyń tamyz aiynan qarashanyń sońyna deiin birqatar jumys atqardy. Biz eldimekenderdi, oblystyń 7 aýdanynyń aýyldyq okrýgtaryn, shette jatqan aýyldardy aralap, úkimettik emes uiymnyń áleýetin qalai arttyramyz, halyqtyń áleýmettik jaǵdaiyn qalai arttyramyz degen sekildi máselelerdi kóterdik. Nátijesinde osy 7 aýdannyń aýyldarynan 400-den asa jobalar kelip tústi. Olardy iriktep, saraptama jumystaryn jasap, 30 jobany bólek shyǵardyq. Joba avtorlaryn oblys ortalyǵyna shaqyryp, baǵyt-baǵdar berip, treningter ótkizdik. Keiin olar sarapshylardan quralǵan kommissiianyń aldynda jobalaryn qorǵady. Sonyń ishinen úzdik degen 5 joba anyqtalyp, árqaisysyna 1 mln teńgeden 5 mln teńge berildi", - dedi ol.
Onyń aitýynsha, memleketten grant utyp alǵan 5 joba avtorlarynyń negizgi maqsaty - aýyl turǵyndaryn jumyspen qamtyp, áleýmettik jaǵdaidyń jaqsarýyna yqpal etý.
"Atalǵan 5 jobaǵa toqtalyp ótsem, olar osymen toqtap qalmaidy, odan ári jalǵasady. Olardyń maqsaaty - aýyl turǵyndarynyń áleýmettik jaǵdaiyna jaqsartýǵa sálde bolsa septigin tigizý. Olardyń barlyǵy tegin qyzmet kórsetedi. Máselen, Isatai aýdanynda provatsiialyq qyzmet kórsetetin ortalyq quryldy. Olar túzetý koloniialarynan kelgen kámeletke tolǵan, tolmaǵan jasóspirimder men eresekterge psihologiialyq járdem beredi. Ártúrli is-sharalar, jarystar ótkizý arqyly olardyń qoǵamǵa qaitadan sińisip, aralasyp ketýine áser etedi. Biz baryp kórdik, ol jerde 30-dan asa sondai azamat bar, jergilikti politsiianyń kómegimen ortalyq qyzmet atqaryp otyr", - dep atap ótti.
Sondai-aq Gúlnáfis Jarmuhanbetova grant ielengen bes jobaǵa jeke-jeke toqtalyp, atqaratyn qyzmetteri jaily aityp berdi.
"Máselen, taǵy bir jobanyń iegeri qolóner sheberhanasyn ashty. Atalǵan jerde tek úide otyrǵan analar ǵana emes, múmkindigi shekteýli azamattar, túrli dertke shaldyqqan qyzdar, DTsP sekildi aýrýlarmen aýyratyn azamattar óz fantaziialaryna bailanysty kóptegen qolóner shyǵarmalaryn dúnege ákelip otyr. Sondai bir jobanyń avtory Jylyoi aýdanynyń birqatar aýylynda kásipkerlik salasynda sabaq beretin mektep ashyp, turǵyndardy biznes salasynan habardar etý maqsatynda túrli kýrstar uiymdastyryp otyr", - dedi ol.
Sonymen birge úkimettik emes qiymdardyń áleýmettik jobalaryn qarjylandyrý aiasynda "Aqniet" aqparattyq nasihattaý jáne ońaltý ortalyǵy da grant alǵan. Sharaǵa atalǵan ortalyqtyń benefitsiary Turǵan Omarov qatysyp, atylmysh uiymǵa alǵysyn aitty. Ol buǵan deiin sottalyp, osy ortalyqtyń mamandarynyń kómegimen radikaldyq sipattaǵy oiyn ózgertip, qatesin túsingenderdiń biri.
"Men buryn terrorlyq uiymdardy uiymdastyrǵanym úshin sottalǵan bolatynmyn. "Aqniet" aqparattyq nasihattaý jáne ońaltý ortalyǵyna birneshe jyl boiyna jazamdy ótegen jerlerge kelip kómek kórsetkeni úshin erekshe alǵys aitqym keledi. Olar meniń radikaldyq sipattaǵy kózqarasymdy ózgertip, qateligimdi túsinýge septigin tigizdi. Sonymen qatar men sekildi kózqarasty ustanymdaǵy kóptegen jandarǵa kómek kórsetti. Qazirgi ýaqytta men osy ortalyqta basqa da sottalǵandardyń radikaldyq sipattaǵy oiyn ózgertýge járdem etip jatyrmyn", - dedi ol.
Aita ketý kerek, jiynǵa qatysýshylar memlekettik granttardy alýǵa ótinimderdi, esepterdi tapsyrý, shart jasasý jóninde aqparat alyp, "Azamattyq bastamalardy qoldaý ortalyǵy" QEAQ-pen ári qarai yntymaqtastyqta jumys isteý máseleleri talqylandy.
