"Ulttyq testileý ortalyǵynyń" direktory Rýslan Emelbaev UBT-ǵa qatysýshylar kóshirip jazý úshin qandai qýlyqqa baratyny týraly aitty. Bul týraly ol jelidegi paraqshasynda jazdy, dep habarlaidy Sputnik Qazaqstan.
Emelbaevtyń aitýynsha, UBT-ny ońai tapsyrǵysy keletin talapkerler kóbine uialy telefon, jasyryn kamera, mikroqulaqqaptar, qaǵaz shpargalka qoldanǵan.
"Biyl 18-shi ret ótip jatqan Ulttyq biryńǵai testileýdiń alǵashqy aptasynda 22 talapker testileýge kirgizý kezinde, al 21 talapker testileý barysynda tyiym salynǵan zattardy qoldanýǵa tyrysqany úshin test tapsyrý múmkindiginen aiyryldy", - dedi ortalyq direktory.
Ol osy aptada bolǵan kezekti bir qýlyq áreket týraly aitty. Test tapsyrýshy ózimen birge kirgizgen dárýmenniń syrtyna test suraqtaryn jazyp, aýditoriiadan shyǵarýǵa talpynǵan.
Alaida onyń bul áreketi qyraǵy baqylaýshylardyń arqasynda júzege aspai qalǵan.
Rýslan Emelbaev testileýdiń barlyq protsesi tolyq nazarda ekenin atap ótti. Sondyqtan test tapsyrmasyn ne olardyń úzindisin aýditoriiadan shyǵaramyn dep úmittenbegen abzal.
"Eńbek árqashan aqtalady. Ulttyq biryńǵai testileýge jaqsylap daiyndalyp, tek óz bilimińizge senseńiz, sizdi bolashaq jarqyn ómirińizde jaqsy marapat kútetin bolady. Sebebi bilim – eń mańyzdy aspap", - dep jazdy "Ulttyq testileý ortalyǵynyń" direktory.
