QR Tótenshe jaǵdailar ministri Iýrii Ilin Jambyl oblysyndaǵy jarylys saldarynan qaza tapqandarǵa nege ár túrli marapat berilgenin túsindirdi, dep habarlaidy QazAqparat.
Memleket basshysy Jambyl oblysy Tótenshe jaǵdailar departamenti Órt sóndirý jáne avariialyq – qutqarý jumystary qyzmeti bastyǵynyń orynbasary Meiirjan Aimanovqa «Halyq qaharmany» ataǵyn berý týraly Jarlyqqa qol qoiǵan edi. Sondai-aq, órt sóndirý kezinde qaza bolǵan qutqarýshylar I jáne III dárejeli Aibyn ordenine usynylǵan.
«Birinshiden, men Jambyl oblysynda bolǵan qaiǵyly oqiǵada qaza tapqan azamattardyń barsha týǵan-týysqandaryna kóńil aitamyn. Sońǵy derek boiynsha, 13 adam qaitys boldy. Ókinishke qarai, úsh adamnyń deregi tabylmai otyr. Jarylystardyń epitsentrinde sol úsheýin izdeý jumystary jalǵasýda. Sondyqtan, qazir Memleket basshysynyń Jarlyǵymen Tótenshe jaǵdailar ministrliginiń, Qorǵanys ministrliginiń birqatar qyzmetkerleri ǵana marapattaldy. Qalǵan qyzmetkerlerdi DNQ saraptamasy boiynsha anyqtap, deneleri tabylǵannan keiin qosymsha memlekettik nagradalarmen marapattaýǵa usynamyz», - dedi Iýrii Ilin.
Sondai-aq, ministr QR Prezidentine qyzmetkerlerdiń erligin joǵary baǵalaǵany úshin alǵys bildirdi.
«Órt sóndirý qyzmeti bastyǵynyń orynbasary «Halyq qaharmany» ataǵyn aldy. Ol alǵashqy jarylys bolǵan kezde órt sóndirýdi, evakýatsiialyq jumystardy uiymdastyrýdy basqardy. Oqiǵa ornynda bolǵan qutqarylǵan qyzmetkerlerdi qosa alǵanda, ol birneshe adamdy qaýipti jerden alyp shyqty. Sodan keiin ekinshi kúshti jarylys boldy, ol sol jarylystyń saldarynan qaitys boldy», - dedi Iýrii Ilin.
Vedomstvo basshysy tártip boiynsha birinshi dárejeli «Aibyn» ordenimen qaitys bolǵan ofitserler quramy, al úshinshi dárejeli «Aibyn» ordenimen qatardaǵy quram sarbazdary marapattalatynyn túsindirdi.
