Memlekettik áleýmettik saqtandyrý qorynyń ókilderi jumyssyz qalýǵa bailanysty tólemderge qatysty máseleni túsindirdi, dep habarlaidy QazAqparat.
«Tótenshe jaǵdaiǵa bailanysty jumysynan aiyrylyp qalǵandarǵa beriletin 42 500 teńge týraly kóptegen suraqtar kelip jatyr. Karantin jaǵdaiynda jumyskerler úide otyrady, al 42 500 teńge berý máselesin jumys berýshi sheshedi. Jumys berýshi ótinish jazyp, qolastynda jumys isteitinderdiń tizimin beredi. Olardyń qansha ýaqyt boiy jumyssyz otyrǵandary, aty-jóni, JSN jáne taǵy da basqa qajetti aqparattar da sol jerge jazylady», - deidi Memlekettik áleýmettik saqtandyrý qory áleýmetpen bailanys departamentiniń direktory Gúlbaǵila Bolatbekova onlai ótken brifingte.
Onyń aitýynsha, jumys berýshiden kelgen qujatty aldymen jergilikti jumyspen qamtý ortalyǵynyń janynan qurylǵan shtab qaraidy.
«El arasynda biryńǵai jiyntyq tóleitin tulǵalar bar. Mysaly, ol úide jumys istegen nemese jeke tulǵalarǵa qyzmet kórsetken azamat bolýy múmkin. Óz jumysyn toqtatqan taksister, úi jinaýshylar da bar. Jiyntyq tólemdi úsh aidan kem tólemegen bolsa – olar da qujattaryn jinap, bizden 42 500 teńge tólem alýyna bolady.
Sondai-aq, mindetti áleýmettik júiesi engizilgennen bastap tólenetin taǵy bir tólem – jumysynan aiyrylýyna bailanysty tólenetin tólem. Bul áleýmettik tólem jumyssyz retinde tirkelgen azamattarǵa beriledi. Eger siz jumysyńyzdan qysqartylǵan boslańyz nemese óz erkińizben jumystan shyqqan bolsańyz – jumyspen qamtý ortalyǵyna jumyssyz retinde tirkelip, anyqtama alyp, bizdiń qorǵa ótinish bere otyryp jumysynan aiyrylý boiynsha áleýmettik tólem alýǵa múmkindigińiz bar. Bul áleýmettik tólemniń mólsheri – sizdiń sońǵy eki jyldaǵy ortasha ailyǵyńyzdyń 40%-y. Bul tólem bir aidan alty aiǵa deiin taǵaiyndalady. Osy eki áleýmettik tólemdi shatastyrmaýlaryńyzdy suraimyz», - deidi ol.
