Oqý-aǵartý ministrligi Balalar jylynda «Jalpyǵa mindetti bilim berý» qory aiasynda oqýshylarǵa kórsetiletin materialdyq kómek erejelerine ózgerister engizdi. Halyqtyń áleýmettik osal sanatyndaǵy 400 myńnan astam bala memleketten qarjylai qoldaýǵa ie bolady, dep habarlaidy vedomstvonyń baspasóz qyzmeti.
"Buǵan deiin bólingen soma 17 myńnan 40 myń teńgege deiin bolsa, biyl ministrlik ótinishi boiynsha ózgerister engizildi. Endi kómek mólsheri eń tómengi kúnkóris deńgeiinen, iaǵni 37 389 teńgeden tómen bolmaýy kerek.
Sondai-aq jergilikti atqarýshy organdardyń usynysymen kómek kórsetý tetigine ózgerister engizildi. Endi aqsha ata-analarǵa balalarymen birge mektep formasyn, aiaq kiimin, keńse taýarlaryn jáne t.b. óz betinshe tańdai alýy úshin beriledi. Buǵan deiin munyń barlyǵyn ákimdikter satyp alatyn jáne taýardyń kólemine, sapasyna jáne t.b. bailanysty máseleler týyndaityn" - delingen habarlamada.
«Jalpyǵa mindetti bilim berý» qorynyń aiasynda ataýly áleýmettik kómek (AÁK) alatyn otbasylardyń balalaryna, sondai-aq AÁK almaityn, biraq jan basyna shaqqandaǵy ortasha tabysy kúnkóris deńgeiinen tómen otbasylardyń balalaryna materialdyq kómek kórsetilmek. Sondai-aq jańa oqý jyly qarsańynda jetim jáne ata-anasynyń qamqorlyǵynsyz qalǵan balalar, tótenshe jaǵdaiǵa tap bolǵan oqýshylar jáne t.b. materialdyq kómek alady.
«Oqý-aǵartý ministrliginiń ókilderi kóp balaly analarmen bir emes, birneshe ret kezdesip, ákimdiktermen máselelerdi talqylap, olardyń tilekterin eskere otyryp, áleýmettik osal balalarǵa kómek kórsetý erejelerin ózgertýge bastama jasady. Ata-analardyń shotyna aqsha tikelei túsip, mektep formasyn, keńse taýarlaryn jáne balalarǵa arnalǵan aiaq kiimdi óz betinshe tańdai alýy úshin zańnamaǵa túzetýler engizdik. Munyń artyqshylyǵy – bala ata-anasymen birge ózi tańdaǵan kiimmen mektepke bara alýynda. Buǵan deiin satyp alýmen ákimdikterdiń qyzmetkerleri ainalysatyn. Osyǵan bailanysty jyl saiyn kiimniń kólemine, sapasyna qatysty máseleler týyndap, balalar onymen júrýge uialatyn. Mektepterdi qarjylandyrýdy, onyń ishinde oqýshylardy qoldaýdy ákimdikter júzege asyratyndyqtan, biyl olar qarjylai kómek alýǵa tiisti barlyq balalarǵa keminde 37 389 teńge kóleminde qarajat bóledi. Bul eń tómengi soma, al buryn somalar ártúrli boldy - 17 myń, 20 myń jáne 25 myń teńgege deiin jetýi múmkin edi. Búgingi tańda eń tómengi mólsherden artyq qarjy bóletin jergilikti atqarýshy organdar da bar. Biz buny tek quptaimyz. Qarajattyń ulǵaiýy bul kómekti alatyn 418 myńnan astam balaǵa óń áser etedi», - dedi Oqý-aǵartý ministrligi Balalardyń quqyqtaryn qorǵaý komiteti tóraǵasynyń orynbasary Dýlat Jekebaev.
