Túrik keńesiniń 10 jyldyǵyna orai TÚRKSOI Jastar kameralyq orkestriniń kontserti Túrkistan qalasynda bastalmaq.
Atalmysh sharany QR Mádeniet jáne sport ministrligi, TÚRKSOI Halyqaralyq uiymy, Túrkistan oblysy ákimdigi birlesip uiymdastyrady. Bul týraly Jastar resýrstyq ortalyǵynda ótken baspasóz-máslihatynda TÚRKSOI Halyqaralyq uiymynyń Bas hatshysy Dúisen Qaseiinov málimdedi.
«Ózderińizge belgili, Halyqaralyq TÚRKSOI uiymy 2017 jyly Túrkistan qalasyn «Túrki áleminiń mádeni astanasy» etip jariialaǵan bolatyn. Óte joǵary deńgeide ótken bul halyqaralyq iri jobanyń izin sýytpai, ótken jyly Elbasymyzdyń bastamasymen oblys ataýy «Túrkistan oblysy» bolyp ózgertilip, oblys ortalyǵy Túrkistan qalasyna kóshirildi. QR Tuńǵysh Prezidenti, Elbasy Nursultan Nazarbaev óziniń «Uly Dalanyń jeti qyry» maqalasynda «Jańa oblys ortalyǵy retinde Túrkistandy damytý barysynda onyń halyqaralyq arenadaǵy bedelin júieli túrde arttyrý qajet» degen bolatyn. Bizdiń uiym osy maqsatta ótken jyly da jańa ashylǵan oblys ortalyǵynda birneshe shara uiymdastyrǵan edi. Biyl da sol dástúrimizdi jalǵastyryp, TÚRKSOI Jastar kameralyq orkestriniń kezekti kontserttik týrnesin 2017 jylǵy «Túrki áleminiń mádeni astanasy» – Túrkistan qalasynan bastap otyrmyz», – dedi Bas hatshy D.Qaseiinov.
Otandyq jáne sheteldik ónerpazdardyń qatysýymen ótetin kontserttiń barysy men maqsatyna arnalǵan baspasóz konferentsiiasyna Reseidiń eńbek sińirgen ártisi Salavatov Renat Salavatuly, QR eńbek sińirgen qairatkeri, dirijer Aqbarov Anvar Asqaruly, Ázerbaijan elinen kelgen dirijer, halyqaralyq baiqaýlardyń laýreaty Mehmendarov Mustafa Ádiloglý da qatysty.
Kontserttik baǵdarlama Qazaqstannyń Túrkistan, Shymkent, Taraz, Almaty qalalarynda, Qyrǵyzstannyń Bishkek jáne Ázerbaijannyń Baký qalalarynda jalǵasatyn bolady.
Búginge deiin quramynda 10 eldiń 100-den astam talantty jastary óner kórsetken orkestrge bul joly Tatarstannan Renat Salavatov, Qazaqstannan Anvar Akbarov, Ázerbaijannan Mustafa Mehmendarov dirijerlik etetin bolady.
Atalǵan qalalar men sheteldegi kontsert 27 tamyz – 9 qyrkúiek kúnderi aralyǵynda ótedi.
