Túrkiialyq kásipker Hýseiin Arslan qazaq eline meditsinalyq qural-jabdyqtar joldady, dep habarlaidy "Ult aqparat" «Habar 24» telearnasyna silteme jasap.
Jarty tonnalyq júktiń ishinde resmi mekemelerde qoldanylatyn jabdyqtar, 1000 dana betperde, meditsinalyq qolǵaptar, kombinezondar, vakýýmdyq kózildirikter jáne 100 dana termometr syndy zattar bar. Atalmysh jabdyqtar elimizdiń densaýlyq saqtaý salasy men arnaiy mekemelerde qoldanylatyn bolady.
Júk tielgen ushaq Nur-Sultan qalasyna qondy. Qiyn kúnde qol ushyn sozǵan túrik baýyrlarymyzdyń atalmysh kómegi elimizdiń koronavirýspen kúresine tyń serpin beredi. Aita ketken jón, atalmysh baýyrlastyq kómek QR Syrtqy ister ministrligi men Air Astana áýe kompaniiasynyń qoldaýymen Ankaradan jóneltildi.
«Qazaqstan – bizdiń atajurtymyz. Tilimiz, dinimiz, qanymyz bir baýyrlas halyqpyz. Qysyltaiańda qol ushyn sozý EDeA holdingi retinde boryshymyz dep bilemiz. Múmkindigi bar azamattardy, onyń ishinde isker adamdardy osyndai qoldaý kórsetýge shaqyramyn. Týystyń týystyǵy, aǵaiynnyń aǵaiyndyǵy qiyn kúnde bilinedi», - deidi túrik kásipkeri Hýseiin Arslan.
Osy ýaqytta Qazaqstanda koronavirýs infektsiiasyn juqtyrǵandar sany 271-ge jetti.
