Foto: Akorda.kz
Memleket basshysy Málik Ǵabdýllin atyndaǵy Azamattyq qorǵaý akademiiasyna bardy, dep habarlaidy "Ult aqparat" Aqordanyń resmi saityna silteme jasap.
Prezident azamattyq qorǵaý salasy boiynsha kadrlar daiyndaityn elimizdegi jalǵyz joǵary oqý orny – Azamattyq qorǵaý akademiiasynyń jumysymen tanysyp, ofitserlermen jáne kýrsanttarmen kezdesti.
Qasym-Jomart Toqaev halqymyzdyń amandyǵyn jáne qaýipsizdigin saqtaý basty mindet ári qasterli paryz ekenin aityp, akademiianyń róline toqtaldy.
– Bul – eń aldymen, qutqarýshy mamandarǵa júkteletin zor senim, úlken jaýapkershilik. Qutqarý qyzmeti – óte mańyzdy sala. Sońǵy kezde jer júzinde tótenshe oqiǵalar jiilep barady. Jurtymyz mundai qaýip-qaterge árdaiym daiyn bolýy kerek. Sondyqtan osy salada qyzmet etip júrgen mamandardyń eńbegi elimiz úshin óte mańyzdy. Akademiia – elimizdegi kásibi qutqarýshylardy daiarlaityn birden-bir oqý orny. Ony shirek ǵasyr ishinde 6 myńǵa jýyq maman bitirip shyqty. Akademiia túlekteri barlyq oblysta eńbek etip júr. Olar Otan aldyndaǵy boryshyn adal atqaryp keledi. Halqymyzda «Apat aityp kelmeidi» degen sóz bar. Kúzde elimizdiń birneshe aimaǵy alapat órtten zardap shekti. Syn saǵatta turǵyndarǵa aldymen qutqarýshylar kómekke keldi, – dedi Memleket basshysy.
Jaqynda Túrkiiadaǵy joiqyn jer silkinisinen keiin Prezidenttiń tapsyrmasymen baýyrlas elge qutqarýshylar men dárigerler jiberildi.
– Olardyń arasynda Aqmola oblysynyń mamandary da bar, iaǵni 18 adam. Bizdiń qutqarýshylar birneshe adamdy aman alyp shyqty. Túrkiiada kúndiz-túni jumys istep jatqan azamattarymyzǵa alǵys aitamyn! Túrkiiadan aman-esen oralǵan soń olardy mindetti túrde marapattaityn bolamyz, – dedi Qasym-Jomart Toqaev.
Qutqarýshynyń jumysy qiyn ári qaterli ekenin aitqan Memleket basshysy eńbektiń bul túrin naǵyz erjúrek azamattardyń kásibi dep baǵalady.
– Tótenshe jaǵdai mamandary jumys barysynda talai ret erlik kórsetti. Basqa adamdardyń ómirine arasha túsip, qaza tapqan qutqarýshylar az emes. Olardyń qatarynda osy akademiianyń túlegi Asqar Zabikýlin de bar. «Er esimi – el esinde». Batyrlardyń erligi eshqashan umytylmaýǵa tiis, – dedi Prezident.
Qasym-Jomart Toqaev azamattyq qorǵanys júiesi turaqty jańǵyrtýdy qajet etetinin, ozyq álemdik tájiribeni qabyldap, zamanaýi tehnologiialardy engizý óte mańyzdy ekenin aitty. Prezidenttiń pikirinshe, qutqarýshylardy sapaly daiyndaýǵa erekshe nazar aýdarý kerek. Memleket basshysy bul máselede komandirler men ustazdar basty ról atqaratynyn atap ótip, óziniń tapsyrmasymen Úkimet akademiianyń materialdyq-tehnikalyq bazasyn nyǵaitýǵa kúsh salyp jatqanyna jáne jataqhana men oqý korpýsyn salý josparlanyp otyrǵanyna toqtaldy. Memleket tarapynan qutqarýshylardyń eńbekaqysyn kóterip, áleýmettik qamtamasyz etýdi jaqsartý úshin júieli sharalar qolǵa alynyp jatyr.
Qasym-Jomart Toqaev sóziniń sońynda akademiia túlekteri halqymyzdyń amandyǵy úshin qyzmet ete beretinine senim bildirip, olarǵa tabys tiledi.
Aita ketetin jait, Prezidenttiń tapsyrmasyna sáikes biyldan bastap qutqarýshylardyń eńbekaqysy 10-nan 70 paiyzǵa deiin kóteriledi.
Bul akademiia jyl saiyn 150-den astam ofitser daiarlap shyǵarady. 2021 jyly ǵylymi jáne ǵylymi-tehnikalyq qyzmet sýbektisi retinde akkreditatsiiadan ótken. Úkimetaralyq kelisimder aiasynda akademiiada Qyrǵyzstan men Tájikstan azamattarynyń bilim alýyna kvota bólingen.
Memleket basshysy akademiianyń tótenshe jaǵdailarǵa arnalǵan tehnikalarymen, oqý-jattyǵý jabdyqtarymen tanysty. Oqý ornynyń mamandary kýrsanttardy praktikalyq turǵydan mashyqtandyrý úshin arnaiy qurylǵylar oilap tapqan. Sol arqyly nysandardyń órtke qarsy qaýipsizdik jaǵdaiyn jáne órtten keiingi ahýalyn 3D modelimen aiqyndaidy.
Qasym-Jomart Toqaev oqý ornynyń materialdyq-tehnikalyq bazasyn zamanaýi qural-jabdyqtarmen qamtamasyz etý qajet ekenin erekshe atap ótti.
