Foto: aa.com.tr
Túrkiianyń ońtústiginde bolǵan joiqyn jer silkinisinen qaza tapqandar sany 45 089 adamǵa jetti, dep habarlaidy QazAqparat Anadoly aqparat agenttigine silteme jasap.
Túrkiia Tótenshe jaǵdailar saldaryn joiý basqarmasynyń (AFAD) málimetinshe, jerasty dúmpýlerinen keiin 11 myńnan astam aftershok tirkelgen. Qazirgi kezde apat aimaǵynda izdeý-qutqarý jumystaryna Túrkiia men shet elderdiń tiisti qyzmetterinen 6 368 adam jumyldyrylǵan.
Sondai-aq jumysqa 234 myńnan astam tartylǵan. Olardyń arasynda AFAD qyzmetkeri, politsiia, áskeriler men eriktiler bar. Habarlamaǵa sáikes, qalpyna keltirý jumystaryna ekskavatorlar, krandar, býldozerler, júk kólikteri, sý tasýshy mashinalar, tirkemelerden turatyn 18 myńnan astam tehnika jumyldyryldy. Zilzaladan zardap shekkender úshin 358 myńnan astam shatyr tigilgeni atap ótildi.
Sonymen qatar 11 provintsiia men 332 eldi mekende konteinerlik qalashyqtar quryldy.
Eske sala keteiik, 6 aqpanda epitsentri Kahramanmarash provintsiiasynyń Pazardjik aýdanynda magnitýdasy 7 baldan asatyn eki jer silkinisi boldy. Júzdegen aftershokqa ulasqan jerasty dúmpýleri eldiń 11 provintsiiasynda, sondai-aq kórshiles memleketterde, sonyń ishinde Siriiada da sezildi. Mamandar aimaqta jerasty dúmpýleri taǵy jarty jyl boiy jalǵasady dep otyr. Túrkiiadaǵy joiqyn jer silkinisinen keiin úiindilerdi ashý jumystaryna 88 elden 11 myń qutqarýshy qatysty. Izdestirý-qutqarý jumystaryna Qazaqstannan Astana men Almaty qalalary, Aqmola jáne Qaraǵandy oblystarynyń qutqarýshylary da atsalysty.
