Qazirgi kezde Túrkiianyń qandai da bir eldi mekenderine qaýip tóndirip turǵan orman órti joq. Bul týraly Túrkiianyń Aýyl jáne orman sharýashylyǵy ministri Bekir Pakdemirli málim etti, dep habarlaidy "Ult aqparat" «Anadoly» aqparat agenttigine silteme jasap.
«Jalpy alǵanda, Muǵladaǵy barlyq orman órtimen bailanysty jaǵdai jaqsaryp keledi», - dep málimdedi Pakdemirli ońtústik-batystaǵy Muǵla provintsiiasynda ótken brifingte.
Onyń aitýynsha, Muǵlada 16 orman órti bolyp, jalynmen kúreske alty ushaq, 39 tikushaq, 630 sýarý mashinasy, 128 ekskavator jáne salalyq qyzmetterdiń 3600 qyzmetkeri jumyldyrylǵan.
Ministr tabiǵi apat saldarynan órtenip ketken aýmaqtar qalpyna keltiriletinine sendirdi.
B.Pakdemirli sondai-aq órtten zardap shegip otyrǵan Grekiiaǵa jalyn oshaqtaryn sóndirýge kómektesýge daiyn ekenin málim etti. Ministrdiń aitýynsha, túrik biligi kórshiles elge órt sóndirý ushaqtaryn jiberý máselesin qarastyrýda.
«Biz máseleni baǵalap otyrmyz. Túrkiiadaǵy orman órtin sóndirip, múmkindigimiz bolsa, Grekiia eline qol ushyn sozamyz», - dep málimdedi ol.
Aita keteiik, buǵan deiin Qazaqstan Prezidenti Qasym-Jomart Toqaev Túrkiia Prezidenti Rejep Taiyp Erdoǵanǵa jedelhat joldap, onda Qazaqstan baýyrlas túrik halqyna gýmanitarlyq kómek kórsetýge daiyn ekenin atap ótken bolatyn.
Al 7 tamyz kúni QR Tótenshe jaǵdailar ministrligi Túrkiiaǵa órt sóndiretin eki arnaiy tikushaq pen 16 qutqarýshyny jiberdi.
