Foto: Syrtqy ister ministrliginiń baspasóz qyzmeti
Qazaqstan SIM resmi ókili Aibek Smadiiarov Astanada ótken brifingide Túrkiiada zardap shekkender boiynsha sońǵy málimetterdi bólisti, dep habarlaidy "Ult aqparat" vedomstvonyń baspasóz qyzmetine silteme jasap.
"Túrkiiadaǵy joiqyn jer silkinisinen keiin Qazaqstannyń Syrtqy ister ministrligine jáne shet elderdegi mekemelerine QR azamattarynan 1200-den astam ótinish kelip tústi. Atqarylǵan jumystyń nátijesinde jer silkinisi kezinde apat aimaǵynda qalyp qoiǵan 190-nan astam otandasymyzdyń ornalasqan jeri anyqtaldy.
Qiraǵan infraqurylymdy, apatty jaǵdaidy jáne turǵyn úilerdiń tolyq buzylýyn eskere otyryp, bizdiń diplomattardyń kómegimen otandastarymyzdy qaýipsiz jerlerge (Ankara jáne Stambýl qalalarda) jetkizý úshin avtobýstar uiymdastyryldy, olarǵa tamaq jáne baspana berildi. Qarajaty joq keibir azamattarǵa Qazaqstanǵa deiin áýe biletterin satyp alýǵa járdem kórsetildi" - dedi SIM baspasóz hatshysy.
Onyń sózinshe, otanyna oralýǵa niet bildirgen 78 azamatymyz apat aýdandarynan gýmanitarlyq áýe kemelerimen Astana jáne Almaty qalalaryna jetkizilgen.
"Osy borttarmen Qazaqstanǵa 24 Qyrǵyzstan azamaty jáne elge oralǵan otandastarymyzdyń otbasy músheleri bolyp tabylatyn 5 Túrkiia azamaty jetkizildi. Olar ministrlik jáne jergilikti ákimdikterdiń kómegimen kólikpen qamtamasyz etildi, sondai-aq baspanaǵa muqtaj azamattar Almaty jáne Astanadaǵy qonaq úilerge ornalastyryldy.
2023 jylǵy 8 aqpanda Túrkiia qutqarýshylary izdeý jumystarynyń nátijesinde Hatai provintsiiasynyń Antakia qalasynda Qazaqstan azamaty Sabina Mamadiarovany qiraǵan úidiń astynan taýyp, shuǵyl túrde Adana qalasyndaǵy «Ceyhan» aýrýhanasyna jetkizdi. Ózderińiz biletindei, onyń zaqymdalǵan qolyna operatsiia jasaldy. Bizdiń Antaliiadaǵy Bas konsýlymyz oǵan jeke baryp qaityp, dárigerimen sóilesti. Qazir ol áli dárigerlerdiń baqylaýynda, janynda týystary bar" - dedi Aibek Smadiiarov.
Sonymen qatar, qaza tapqan otandastarymyzdyń týystaryna máiitterdi elge jetkizýge kómek kórsetilgen.
"Búgingi tańda Túrkiiada jer silkinisi saldarynan joǵalǵan QR azamattary týraly qosymsha aqparat kelip túsken joq. Degenmen diplomattarymyz jergilikti bilikpen bailanysta jáne qaza tapqandar men zardap shekkenderdiń tizimderin muqiiat tekserip keledi" - dep túiindedi SIM resmi ókili.
