5 qazanda Túrkistan oblysy ákiminiń orynbasary Arman Sabitov Ózbekstan Respýblikasy Ferǵana oblysy hokiminiń orynbasary Hýrshidjon Ahmedovpen kezdesý ótkizdi, dep habarlaidy «Ult aqparat» Túrkistan oblysy ákimdiginiń baspasóz qyzmetine silteme jasap.
Kezdesýde eki óńir arasyndaǵy bailanysty nyǵaitý máseleleri keńinen talqylandy.
«Kásipkerlik, biznes salasynda áriptestik ornatýǵa daiynbyz. Túrkistan – elimizdegi agrosala eń jaqsy damyǵan óńir. Bul baǵytta da birlese jumys isteýge múmkindik bar. Jalpy aldaǵy ýaqytta eki eldiń biznes ókilderiniń qatysýymen forým ótkizý máselesi de mańyzdy. Biznes jobalardy, usynystardy talqylaýǵa ázirmiz», – dedi Arman Sabitov.
Ferǵana oblysy hokiminiń týrizm, sport, Mádeniet, mádeni mura jáne buqaralyq kommýnikatsiialar jónindegi orynbasary Hýrshidjon Ahmedov Ferǵana oblysynyń aýyl shaýrashylyǵy jáne kásipkerlik salasyndaǵy jetistikterimen tanystyrdy. Túrkistannyń týristik áleýetin joǵary baǵalady.
«Bul – meniń Qazaqstanǵa, onyń ishinde Túrkistanǵa alǵash kelýim. Áserim óte jaqsy. Túrkistan taza ári jańa qala eken. Týrizm salasy boiynsha múmkindigi mol ekenin ańǵardym. Biz baýyrlas elmen, tarihi shaharmen bailanysty nyǵaitýǵa múddelimiz. Ferǵana oblysynda aýyl sharýashylyǵy men ónerkásip óte jaqsy damyǵan. Jemis-jidekterimiz shet memleketterge turaqty túrde ekspottalyp jatyr. Túrkistanmen bailanysty tereńdetip, týrizm, mádeniet salalarynda birlese jumys atqarýǵa múmkindik mol», – dedi Ózbekstan ókili.
Kezdesý barysynda týrizm salasynda ekijaqty yntymaqtastyq máseleleri talqylanyp, qos tarap óńirler arasynda týrizm salasyn damytý baǵytynda birlese jumys atqarý jóninde ýaǵdalasty.
Kezdesý nátijesinde Túrkistan oblysy ákimdigi men Ferǵana oblysy hokimiiaty arasynda baýyrlas qatynastardy damytý jáne jalǵastyrý týraly kelisimge qol qoiyldy.
Qazirgi tańda Ferǵana oblysynda 4 millionǵa jýyq turǵyn bar. Osy sapar nátijesinde Túrkistan oblysynyń týristik áleýeti Ferǵana alqabynda turatyn halyqqa nasihattalatyn bolady.
Aita keteiik, Ferǵana oblysynan quramynda buqaralyq aqparat quraldary ókilderinen, blogerlerden, týristik mekemeler ókilderinen turatyn bir top delegatsiia Túrkistan oblysynyń týristik áleýetimen tanysýǵa jáne óz óńirlerinde Túrkistan týraly aqparat taratý maqsatynda arnaiy kelgen. 2 kún barysynda atalǵan delegatsiia óńirdiń týristik nysandarymen tanysady. Sonymen qatar Ferǵana oblysynan kelgen týrizm biznesiniń ókilderi men qazaqstandyq týrizm biznesi ókilderi arasynda 10 mln. dollarǵa kelsimshart jasasý josparlanyp otyr.
