Túrkistan oblysynda er adam kóliginde birge otyrǵan jolaýshyny syrtqa shyǵaryp, kósheniń qaq ortasynda pyshaqtaǵan, dep habarlaidy "Ult aqparat".
Oqiǵa naýryzdyń 12-sinen 13-ine qaraǵan túni saǵat 23:30 shamasynda bolǵan. Kúdikti Kentaý qalasynyń jergilikti turǵyny jáne buryn sotty bolǵany anyqtaldy. Ol jolaýshy retinde kóliginiń artqy jaǵynda otyrǵan jigitti jol boiyna shyǵaryp alyp, moinynan pyshaq suqqan. Jaraqattanǵan jigit, aýrýhanada kóz jumdy.
Qazirgi tańda kúdikti qamaýda, oǵan qatysty QR QK-niń 99-baby 1-bóligi («Adam óltirý») boiynsha sotqa deiingi tergep-tekserý amaldary júrgizilýde.
Túrkistan oblysy Politsiia departamentiniń Instagram-daǵy resmi paraqshasyna Túrkistan qalasynyń turǵyny júginip, Nurlan esimdi politsiia qyzmetkeriniń batyrlyq áreketine kýá bolǵanyn, sol úshin oǵan alǵys aitqysy keletinin jetkizgen.
Anyqtalǵandai, qala turǵyny túngi ýaqytta Túrkistannan Kentaý qalasyna óz kóligimen ketip bara jatqanda jol boiynda jinalyp turǵan bir top adamdardy kórgen.
«Jol-kólik oqiǵasy boldy ma, adamdar nege jinalyp tur dep men de toqtap, jaqyndadym. Bir jigit joldyń ortasynda ekinshi bir jigittiń moinyna pyshaq suǵyp, ústine otyryp alyp, jibermei tur eken. Sol jerde turǵan basqa da kýágerlermen birge ekeýin ajyratpaqshy bolyp, jábirlenýshini qutqarǵymyz kelip jaqyndai bergenimizde, qolyndaǵy pyshaǵyn bizge sermep, «jaqyndasańdar barlyǵyńdy óltiremin» dep mańyna da jolatpady. Qoryqqanymyzdan ne isterimizdi bilmei qaldyq. Politsiia men jedel járdemge habar berdik.
Sol sátte bizdiń janymyzǵa kólik kelip toqtady da, ishinen bir politsiia qyzmetkeri atyp shyqty. Júgirip baryp, qylmyskerdiń qolynan shap berip, pyshaǵyn alyp, onyń qarsylasqanyna qaramastan, qolyn qaiyrdy. Osylaisha kóz aldymyzda biz daýalamai turǵan oqiǵany birden toqtatty. Sálden soń basqa da politsiia qyzmetkerleri men jedel járdem keldi. Biz birneshe adamdar sol kezde óz-ózimizge áreń kelip, politseidiń qolyn qysyp, raqmet aittyq», - dep jazdy oqiǵaǵa kýá bolǵan túrkistandyq.
Onyń aitýynsha, adamdar batyl politseidiń esimin ǵana surap úlgergen.
«Osy bir oqiǵa kóz aldymda bolǵandyqtan politseidiń jasaǵan is-áreketi úshin ony qalai da taýyp, rizashylyǵymdy jetkizýim kerek dep oiladym. Osy sátte QR IIM-ne osyndai batyr politseilerdi jumysqa alyp, tárbielegenderi úshin alǵys aitamyn. Nurlan siiaqty politseiler kóp bolsyn!», - deidi qala turǵyny.
Osy hattan keiin Politsiia departamentiniń qyzmetkerleri oqiǵa kýágerine paraqshaǵa qaldyrǵan telefon nómiri boiynsha habarlasqan.
Málim bolǵandai, qylmyskerdi quryqtaǵan politsei – Kentaý qalalyq politsiia bóliminiń ýchaskelik qyzmetkeri, maior Nurlan Ábdiev.
N.Ábdievtiń sózinshe, barlyǵy qas-qaǵym sátte bolǵan.
«Ýchaskelik politsei bolǵandyqtan sol kúni túngi shaqyrtýdan shyǵyp, qyzmet babymen áriptesim – ýchaskelik politsiia inspektory, politsiia maiory Birjan Ábýbákirmen birge Túrkistan qalasyna ketip bara jatqan edik. Qarasaq, joldyń ortasynda adamdar jinalyp tur, janynda kólik toqtap tur eken. Anyqtap qarasam, belgisiz bir azamat qolynda pyshaǵy bar, ekinshi bir jigittiń ústine shyǵyp alyp, jibermei tur. Bergi jaǵynda adamdar jaqyndai almai úreilenip tur eken. Kólik toqtai salysymen birden tústim de, qylmyskerdiń sózin tyńdamastan birneshe ádis-tásilimdi qoldanyp, árkez shynyǵyp júrgenniń arqasynda ony quryqtap úlgerdim. Basqa da kýágerlerge ziianyn tigizbesin dep áriptesterim kelgenshe ustap otyrdym. Kúdiktiniń qolyna kisen salyp, politsiia bólimine jetkizdik. Sol sátte kýágerler kelip qolymdy qysyp, alǵys aitty. Biraq men bul áreketimdi batyrlyq dep eseptemeimin, men tek óz qyzmetimdi atqardym. Bizdi qyzmetke alǵash qabyldaǵanda «Sender jumysta bolsańdar da, bolmasańdar da, qylmys oryn alsa, sol sátte tiisti áreketti jasap, oqiǵanyń órshimeýine yqpal etýleriń kerek. Óitkeni sender politseisińder» dep úiretken. Sondyqtan men óz mindetimdi atqardym», - deidi politsiia qyzmetkeri.
