Búgin Túrkistan oblystyq «Farab» ámbebap ǵylymi kitaphanasynyń ujymy eki birdei jetistikke jetip otyr. Almaty qalasyndaǵy QR Ulttyq kitaphanasynda ótip jatqan «Qazaqstandyq Kitaphanalyq Odaq» uiymynyń otyrysynda oblystyq kitaphana direktory Janat Shardarbekova «Jyl kitaphanashysy – 2022» ataǵymen marapattady. Ony «Qazaqstandyq Kitaphanalyq Odaq tóraiymy Baqytjamal Ospanova tapsyrdy. Bul mártebe elimiz boiynsha 20 myńǵa jýyq kitaphanashynyń arasynan jylyna tek bir kitaphanashyǵa beriledi.
«Jyl saiyn Odaqtyń kezekti otyrysy uiymdastyrylyp, túrli máseleler talqylanady. Biylǵy jiynda QR Mádeniet týraly Zańynyń 24-shi baby – kitaphana isi boiynsha ózgeris engizý týraly qarastyrylyp, kitaphanashylar óz usynystaryn bildirdi. Ári qarai Zań jobasy Parlamentke usynylatyn bolady. Atalmysh nominatsiiaǵa laiyqty dep tanyǵan basshylyqqa alǵysym sheksiz. Bul arqyly úlken jaýapkershilik, senim artyldy. Bul – Túrkistan oblysyndaǵy 395 kitaphananyń birlese atqarǵan eńbeginiń nátijesi», – dedi Janat Sádibekqyzy.
Sondai-aq Aqtóbe oblysynyń mádeniet, arhivter jáne qujattama basqarmasy men Aqtóbe oblystyq zaǵiptar jáne nashar kóretin azamattardyń arnaýly kitaphanasynyń uiymdastyrýymen ótken «Erekshe kitaptar álemi» jobasy aiasyndaǵy «Keńistikte baǵdarlaý» respýblikalyq baiqaýy da aiaqtaldy. Túrkistan oblystyq «Farab» ámbebap ǵylymi kitaphanasy III orynǵa ie bolyp, arnaiy diplommen marapattaldy. Eki ai kóleminde zaǵip, kózi nashar kóretin balalarǵa arnalǵan taktildi kitaptardy kitaphana qyzmetkerleri Aliia Jumabek pen Dana Baidáýletova, Sultanbekova Ainur óz qolymen tikken bolatyn.
Aita keteiik, halyqtyń rýhani igiligi úshin elimizdiń kitaphana isin nyǵaitý jolynda kúsh-jigerin aiamai eńbek etip júrgen rýhaniiat shyraqshylary jaqyn kúnderi kásibi merekelerin toilaýy múmkin. Iaǵni, elimizde 24 qazan – Kitaphanashylar kúnin atap ótý josparlanýda.
