Túrkistan qalasynda bolǵan órt saldarynan jaraqat alǵan oblystyq tótenshe jaǵdai qyzmetkerleriniń jaǵdaiyn bilýge QR Ishki ister ministri, politsiia general-leitenanty Erlan Turǵymbaev pen QR Densaýlyq saqtaý ministri Eljan Birtanovtar keldi. Olar Túrkistan oblysynyń ortalyq aýrýhanasyna baryp, naýqastarmen kezdesti, dep habarlaidy "Ult aqparat".
Eki ministr de aýrýhanada kúiik shalyp jatqan 6 órt sóndirýshimen tildesip, olardyń amandyǵy men densaýlyqtarynyń jaqsarǵanyna kózderin jetkizdi. Qajet bolǵan barlyq kómekterdiń der kezinde kórsetiletinin atap ótti.
Eske sala ketsek, keshe 10 qyrkúiek kúni shamamen saǵat 18.25-te Túrkistan qalasyndaǵy «Roial-grand» qonaqúii órtendi. Oqiǵa ornyna politseiler men TJK qyzmetkerleri jedel jetip, jaqyn mańdaǵy aýmaqtardy qorshaýǵa alyp, qonaq úidiń qyzmetkerleri men qonaqtardy evakýatsiialady. Órtten qutqarý jumystary barysynda jalpy 50 adam qaýipsiz jerge shyǵaryldy.
Órt kezinde patrýldik politsiia batalon komandiriniń orynbasary, politsiia maiory Qanat Rakyshev pen Túrkistan qalalyq tótenshe jaǵdailar basqarmasynyń azamattyq qorǵaý maiory Bolat Túimenov adam shyǵynyn keltirmes úshin barlyq bólmelerdi tintip shyqty. Nátijesinde tártip saqshylary órt qaýmalaǵan ǵimarattan 4 jasar qyzdy jáne Túrkiianyń eki azamatyn qutqardy. Tótenshe jaǵdaidan qaza bolǵandar joq.
Órtti aýyzdyqtaý barysynda Túrkistan oblysy TJQ-niń 5 qyzmetkeri jaraqattanyp, túrli dárejedegi kúiik jáne jaraqattarymen ortalyq aýrýhanaǵa jatqyzyldy. Olardyń arasynda jansaqtaý bóliminde aýyr halde jatqan Túrkistan oblysy TJQ QB bastyǵynyń orynbasary, azamattyq qorǵaý podpolkovnigi Baqytjan Abdýǵapparov bar bolatyn. Búgingi tańda onyń jaǵdaiy jaqsarǵan.
Qazirgi tańda Túrkistan qalalyq politsiia basqarmasynyń tergeýshilerimen qonaqúidiń órtke oranýy boiynsha QR Qylmystyq kodeksiniń 292-baby «Órt qaýipsizdigi talaptaryn buzý» boiynsha sotqa deiingi tergep-tekserý amaldary júrgizilýde. Saraptamalar taǵaiyndaldy. Tergep-tekserý barysynda oqiǵanyń barlyq mán-jaiy, onyń ishinde órttiń shyǵý sebebi anyqtalatyn bolady.
