20 naýryzda Túrkistan oblystyq máslihatynyń kezekten tys HHHIII sessiiasy ótti, dep habarlaidy oblystyq ákimdiktiń baspasóz qyzmeti.
Onda Qazaqstan Prezidenti Qasym-Jomart Toqaevtyń Parlament palatalarynyń birlesken otyrysynda Tuńǵysh Prezidenttiń esimin máńgilikke qaldyrý úshin oblys ortalyqtaryndaǵy negizgi kóshelerdiń birin Nursultan Nazarbaevtyń esimimen ataý týraly bastamasy qaraldy.
Sessiia sheshimi boiynsha oblys ortalyǵyndaǵy Arbat dańǵylyna Nursultan Nazarbaev esimi berilý týraly usynys aitylyp, ol depýtattar tarapynan qoldaý tapty.
Nátijesinde Túrkistan qalasyndaǵy iri kóshelerdiń biri - Arbat dańǵylyna Nursultan Nazarbaevtyń esimi berildi.
Bul dańǵyl Bekzat Sattarhanov dańǵylynyń qiylysynan bastap, Táýke han dańǵyly men Názir Tórequlov kóshesiniń qiylysyna deiingi aralyqty qamtidy.
Eske sala keteiik, 2018 jyldyń maýsym aiynda Ult Kóshbasshysy Nursultan Nazarbaev Ońtústik Qazaqstan oblysyn Túrkistan oblysy dep qaita qurý týraly Jarlyq shyǵarǵan bolatyn. Búgingi tańda Túrkistan qalasy oblys ortalyǵy retinde qarqyndy túrde damyp keledi. Qalada aýqymdy qurylys jumystary júrgizilip jatyr.
Sondai-aq Óskemen men Pavlodar, Taldyqorǵandaǵy Táýelsizdik dańǵyldaryna, Oraldaǵy Dostyq dańǵylyna, Kókshetaýdaǵy Gorkii dańǵylyna, Shymkenttegi Astana kóshesine, Petropavl men Qaraǵandydaǵy Mir kóshelerine Nazarbaevtyń aty berildi. Kóshe ataýlaryn ózgertý týraly sheshimdi qalalyq máslihattar qabyldady.
Aita keteiik, 20 naýryzda Parlamenttiń qos palatasynyń birlesken otyrysynda Qazaqstan halqyna ant berip, Prezident qyzmetine kirisken Qasym-Jomart Toqaev memleket astanasyna eldiń tuńǵysh prezidenti Nursultan Nazarbaevtyń esimin berýdi usyndy. Ol "oblys ortalyqtaryndaǵy negizgi kóshelerge Nazarbaev atyn berý kerek" dedi. Osy kúni parlament Astana ataýyn Nursultan dep ózgertý týraly zań jobasyn qabyldaǵan.
