Búgin Túrkistan qalasyndaǵy «Kongress Holl» kópsalaly kesheninde «Uly Dalanyń jeti qyry» fotokórmesi uiymdastyryldy. Atalǵan fotokórme Túrkistan oblysy qoǵamdyq damý basqarmasy men «Ońtústik jastary» qoǵamdyq qorynyń uiytqy bolýymen ótti, dep habarlaidy «Ult aqaparat» Túrkistan oblysynyń Óńirlik kommýnikatsiialar qyzmetine silteme jasap.
Rýhani qundylyǵy mol sharada halqymyzdyń salt-dástúri, Túrkistan oblysynyń tarihi oryndary jáne mádeni sáýlettik eskertkishterinen syr shertetin sýretter qoiylyp, kórmege kelýshilerdiń jaqynyraq tanysýyna múmkindik jasaldy. Saiysqa oblys boiynsha 17 aýdan, qaladan 50-den astam fototilshi qatysyp, árqaisysy ózderiniń taqyrypqa sai eki týyndysyn kópshilik nazaryna usyndy.
Fotoónerdi qoldaý maqsatynda uiymdastyrylǵan igilikti sharaǵa Túrkistan oblysy qoǵamdyq damý basqarmasy basshysynyń orynbasary Bahyt Ahymbetov qatysyp, óńirimizde sýretke túsirý óneriniń damyp kele jatqanyn atap ótti. Kórme barysynda kórermenderge suraqtar qoiylyp, utymdy jaýap bergenderge arnaiy syilyqtar tabystaldy. Óńirimizdiń tańdaýly fotograftary Túrkistan oblysynda atqarylyp jatqan jumystar men ózgeristerge rizashylyqtaryn bildirdi. Respýblika boiynsha týristik jáne kieli oryndardyń kóp shoǵyry ornalasqan Túrkistan oblysynyń tarihi eskertkishteri men oryndaryn sýretke túsirip, talǵamy biik jurtqa jetkizgenderin aitty.
Mazmundy fotokórme kontserttik baǵdarlamaǵa ulasyp, jeńimpazdardy marapattaý rásimimen jalǵasty. Saiys qorytyndysynda Túrkistan qalasyndaǵy «Lux media» mekemesiniń fototilshisi Orazǵali Asan bas júldege laiyq dep tabylyp, 500 000 teńge syiaqyny ielendi. I oryndy Sozaq aýdanynan kelgen jas ana, áýesqoi fototilshi Móldir Egeshova (300 000 teńge), II oryndy «Túrkistan-media» JShS-nyń fototilshisi Erdáýlet Saǵyndyq (200 000 teńge) jeńip aldy. Al III oryn Sozaq aýdanynan kelgen Asyljan Qoshqar men Q.A.Iasaýi atyndaǵy HQTÝ-niń stýdenti Arýjan Temýrovǵa buiyrdy, olardyń árqaisysyna 50 myń teńge kóleminde qarjylai syi-siiapat tabys etildi.
Kórme sońynda sharaǵa qatysýshylar ózara pikir almasyp, uiymdastyrýshylarǵa óz alǵystaryn bildirdi.
