Túrkistandaǵy Oqýshylar saraiynda «Ustaz joly – uly jol» taqyrybynda Ustazdar kúnine orai merekelik kontsert ótti. Oǵan Túrkistan oblysy ákimi Darhan Amangeldiuly Satybaldy qatysyp, bilim salasynda aianbai eńbek etken barsha ustazdar qaýymyn kásibi merekesimen quttyqtady, dep habarlaidy «Ult aqparat» Túrkistan oblysy ákimdiginiń baspasóz qyzmetine silteme jasap.
«Qurmetti ustazdar! Barshańyzdyń otbasylaryńyzǵa – amandyq, denderińizge – saýlyq, eńbekterińizge tabys tileimin. Mereke qutty bolsyn. Ustaz – jai bilim beretin mamandyq iesi emes. Ol – ekinshi ata-ana, tárbieniń de qainar kózi. Bárimiz de ustazdarǵa qaryzdarmyz. Sondyqtan ulaǵatty ustazdardyń aldynda barlyq adam qurmetpen bas iedi», – degen Darhan Satybaldy bilim salasynda jetken jetistiktermen de bólisip, eleýli eńbektiń bári ustazdardyń qajyrly eńbeginiń jemisi ekenin atap ótti.
Ulttyq biryńǵai testileý nátijesi boiynsha respýblikadaǵy 7500 mekteptiń «100 úzdik mektebi» tizimine Túrkistan oblysynyń 11 mektebi endi. Oqýshylarymyz 6 halyqaralyq, 24 respýblikalyq bilim saiystaryna qatysty. Dodalardan 25 altyn, 32 kúmis, 64 qola medal ielendi. Respýblikalyq «Ulttyq mektep ligasy» jarysy da tabysty ótti. Túrkistan oblysynyń oqýshylary 11 altyn, 9 kúmis, 7 qola medalǵa qol jetkizip, jalpykomandalyq esepte I orynǵa ie boldy. Bul – úlken maqtanysh. Osy derekterge toqtalǵan óńir basshysy respýblikalyq, oblystyq olimpiada jáne sport jarystarynyń jeńimpazdaryn daiyndaǵan 20 muǵalimge óz atynan marapat usynyp, arnaiy syilyqtar tabystady.
Merekelik is-shara «Uly ustaz – Ál-Farabi» sahnalyq qoiylymymen jalǵasyp, ardager ustazdarǵa da qurmet kórsetildi. Olardyń arasynda Darhan Satybaldyǵa bilim bergen 2 ardager ustaz da arnaiy qatysyp, izbasar áriptesterin quttyqtady. Áýezdi ánder shyrqalyp, myń buralǵan bishilerdiń óneri dúiim jurtqa erekshe kóńil-kúi syilady.
Túrkistan oblysynda jalpy 983 (onyń ishinde 75 jekemenshik) mektep bar. Sońǵy jyldary 83 jańa mektep paidalanýǵa berildi, al qazir 59 mektep salynyp jatyr. Sonymen birge ustazdardyń biliktiligin kóterý jumystary da jalǵasady.
