Túrkistan oblysynda turmystyq qatty qaldyqtar tastaityn poligondar rettelip, talapqa sai bolýy qadaǵalanady, dep habarlaidy «Ult aqparat» Túrkistan oblysy ákimdiginiń baspasóz qyzmetine silteme jasap.
Ǵaryshtan túsirilim jasaý arqyly 2021 jyly 347 zańsyz qoqys orny anyqtalsa, biyl olardyń sany 400-den asqan. Olardyń júzden astamynda jumys baiaý. Oblys ákimi Darhan Satybaldynyń tóraǵalyǵymen ótken aptalyq apparat otyrysynda osy túitkil talqylandy. Óńir basshysy turmystyq qaldyqtar tastaityn poligondary qaraýsyz qalǵan aýdan, qala basshylaryna jumysty shiratýdy tapsyrdy. Tazalyqty qamtamasyz ete almai otyrǵandar oblys ákiminen eskertý aldy.
«Kúl-qoqysty tazalai almaǵan ákimniń basqa tirligi týraly aitýdyń ózi artyq. Tazalyq – tabaldyryqtan bastalady. Ainalamyzdy taza ustaý ózi qolymyzda. Máseleni biýdjetke buryp qoiyp, otyrý – aqylǵa qonymsyz. Bul tirlik – tikelei óz mindetterińiz. Tazalyqty retke keltire almai otyrǵan ákimderge shara qoldanylsyn», – dedi ol.
Túrkistan oblysy tabiǵi resýrstar jáne tabiǵat paidalanýdy retteý basqarmasynyń basshysy Q.Ábdýalievtiń aitýynsha, oblys aýmaǵynda qatty turmystyq qaldyqtar tastaityn 158 poligon oryndary belgilenip, qujattandyrylǵan. Alaida olardyń jartysynan astamy sanitarlyq talaptarǵa sáikes kelmeidi. Atap aitqanda, poligondar qorshaýmen jabdyqtalmaǵan, kólikterdiń dóńgelekterin dezinfektsiialaýshy beton vannasy men arnaiy eritindisi joq, qaldyqtardyń kólemin ólsheitin tarazy qoiylmaǵan jáne kógaldandyrylmaǵan.
«Halyq arasynda túsindirý jumystary óz deńgeiinde bolmaǵandyqtan aýyl- aimaqtarda kúl-qoqystardy kez kelgen jerge tastap ketý faktileri jyl saiyn kóbeiip keledi. Osy baǵytta kemshilikti joiý maqsatynda jyl basynda jumysshy top qurylyp, aýdan, qala aýmaqtaryn aralap, bei-bereket qoqys oryndaryn joiý boiynsha túsindirý jumystary júrgizilgen. Oblys aýmaǵynda turǵyndar sanynyń artýyna bailanysty, qatty turmystyq qaldyqtar kólemi de artyp keledi», – dedi basqarma basshysy.
Ótken jyly qoqystardy qaita óńdeý úlesi boiynsha meje tolyq oryndalǵan. Biyl da jumystar atqarylýy qajet. Poligondar máselesin túpkilikti sheshý maqsatynda Qazyǵurtta – tórt, Sozaqta bir poligonnyń qurylysy jergilikti biýdjet esebinen júrgizilgen. Sozaq, Ordabasy aýdandarynda 8 poligon salý josparda bar. Sonymen qatar Kentaý, Arys qalasy men Qazyǵurt, Báidibek, Keles jáne basqa aýdandarda 37 poligonnyń jobalyq-smetalyq qujatyn ázirleýge jumystar atqarylýda.
Oblys ákimi Darhan Satybaldy poligondardyń sapasyn arttyryp, erejege sáikes kógaldandyrý jumystaryn júrgizý, jan-jaǵyn qorshaý jol tóseý jumystaryn atqarý jóninde tapsyrma berdi.
