Biyl Túrkistan oblysynda 152 aýyldyq eldi mekendi sapaly internetpen qamtý josparlanyp, onyń 51 aýylda jańa bazalyq stantsiia iske qosyldy. Qalǵan 101 eldi meken jyl sońyna deiin internetpen qamtylady. Atalǵan másele Túrkistan oblysy ákimi apparatynyń aptalyq otyrysynda talqylandy. Oblys ákimi Darhan Satybaldy aimaqta ǵalamtor men bailanystyń sapasyn arttyrý jumystaryn jalǵastyrýdy tapsyrdy.
«Ǵalamtor jáne tsifrlandyrý máselesi óte ózekti. Keibir aimaqtarda ǵalamtor sapasy nashar. Ony aýdan turǵyndarymen kezdesýde el aityp jatyr. Árbir aýdan, aýyldaǵy bailanys sapasy nazarǵa alynyp, jyldam ǵalamtormen qamtamasyz etý jumysy jalǵasýy tiis. Jyl sońyna deiin jospardaǵy 100-den astam eldi mekendi internetpen qamtý jumystary tolyq atqarylsyn», – dedi Darhan Satybaldy.
Túrkistan oblystyq tsifrlandyrý, memlekettik qyzmetter kórsetý jáne arhivter basqarmasynyń basshysy E.Ótebaevtiń aitýynsha, Túrkistan oblysy aýmaǵynda 838 aýyldyq eldi meken bar. Aýdan, qala ákimdikteriniń taldaý jáne analizdeý aqparaty nátijeleri boiynsha 642 eldi mekendegi 1 753 012 turǵyn sapaly internetpen qamtylǵan, bul – jalpy oblystyń 73,7 paiyzy. Onda 441129 oqýshy 3G jáne 4G mobildi jelisimen qamtamasyz etilgen, 123 aýyldyq eldi mekende 63 myńǵa jýyq oqýshy 2G mobildi jelisimen qamtamasyz etilgen.
«250+» jobasy aiasynda 2020-2021 jyldary 129 eldi mekende mobildik internet sapasy artqan. MJÁ jobasy aiasynda 376 eldi meken talshyqty-optikalyq internetpen qamtamasyz etildi. Qazaqstanda alǵash ret Túrkistan óńirinde «Qazaqtelekom» jáne «Transtelekom» aktsionerlik qoǵamdary tarapynan memlekettik-jekeshelik áriptestik jobasy boiynsha aýyldarda talshyqty-optikasyn paidalaný iske asyryldy. 2021 jyly 82 aýyldyq eldi mekendi internetke aýa arqyly radiomost tehnologiiasymen qosty. Qazir osy 82 aýyldyq eldi-meken turǵyndary, ol degenimiz 6000-ǵa jýyq jeke turǵyn úi joǵary jyldamdyqty internet paidalanýda.
Apparat otyrysynda biylǵy biýdjettiń igerilýi máselesi de sóz boldy. Oblystyq qarjy jáne memlekettik aktivter basqarmasynyń basshysy A.Tasybaevtyń aitýynsha, osy jyldyń 1 qyrkúiegindegi kórsetkish boiynsha oblys biýdjetine túsetin ózindik kirister 118,7 mlrd. teńge bolady dep kózdelgen. Esepti kezeńdegi oryndalýy 100 mlrd. teńgeni qurady. Ótken jyldyń uqsas kezeńimen salystyrǵanda túsimder 26,5 mlrd. teńgege artqan nemese ósý qarqyny 36,1%-dy qurady.
Oblys ákimi Darhan Satybaldy biýdjetti durys josparlap, konkýrstardy ýaqtyly igerý kerektigin aitty. Biýdjetti óz deńgeiinde igere almaǵan birqatar basqarma basshylary men aýdan, qala ákimderin synǵa alyp, jumysty shiratýdy tapsyrdy.
