Búgin Túrkistan oblysy qoǵamdyq damý basqarmasynyń «Jastar resýrstyq ortalyǵy» KMM uiymdastyrýymen 8-shi ret ótkizilip otyrǵan oblystyq «Mereili otbasy – 2022» ulttyq baiqaýynyń jeńimpazdaryn marapattaý sharasy ótti. Bul týraly Túrkistan oblystyq óńirlik kommýnikatsiialar qyzmeti habarlady.
Shańyraqtyń bereke-birligin nasihattaǵan mereili sharada sóz alǵan Túrkistan oblysy qoǵamdyq damý basqarmasynyń basshysy Ańsar Óserbaev jeńimpazdardy arnaiy quttyqtap, baiqaýda belsendilik tanytqan barlyq otbasyǵa alǵysyn bildirdi.
«Dana halqymyz «Otan – otbasynan bastalady» degen ulaǵatty sózdi tekke aitpaǵan. Otbasy qai zamanda bolsyn myqty memlekettiń negizi bolyp sanalady. Biyl ulttyq baiqaýǵa qatysý úshin Túrkistan oblysynan 116 otbasy ótinish bildirdi. Oblystaǵy barlyq aýdan, qalalarda uiymdastyrylǵan baiqaýdyń alǵashqy kezeńinde 26 otbasy jeńimpaz atandy. Arnaiy komissiianyń sheshimimen otbasylar anyqtalyp, júldeler men syilyqtar beriledi. Sharanyń basty maqsaty – otbasy qundylyqtaryn dáripteý jáne ár aýdannan kelgen túrli salada júrgen otbasylardy jas býynǵa úlgi retinde kórsetý», – dedi Ańsar Jańabaiuly.
Ádilqazylardyń sheshimi boiynsha baiqaýdyń bas júldesin 4 ul, 3 qyz dúniege ákelip, 31 nemere, 25 shóbere ósirgen Túrkistan qalasynyń Qulbaiymbetovter otbasy ielendi. Áýlettiń tiregi 81 jastaǵy zeinetker Jarqynbek Qulbaiymbetov 40 jyl muǵalim qyzmetin atqarǵan. II oryndy 7 ul, 1 qyz dúniege ákelip, 33 nemere ósirgen Tólebi aýdanynan Ájibaevtar otbasy laiyq dep tanyldy. Al III oryndy 8 ul-qyz ósirip, etnosaralyq kelisim men birlikti nyǵaitýǵa eleýli eńbek sińirip júrgen Sairam aýdanynyń turǵyndary Ilhamjanovtar otbasy ielendi.
Shara barysynda basqarma basshysy jeńimpaz jáne júldeger otbasylardy Alǵys hattar jáne sertifikattarmen marapattady. Sondai-aq baiqaýda baq synaǵan 23 otbasyǵa yntalandyrý syilyqtary tabystaldy.
