Túrkistan oblysynda 41 sý qoima, 12 sý toraby jáne 120 (5 iri) ózen bar. Olar kóktemgi sý tasqyny kezeńine daiyn ba? Osy másele oblys ákimi Darhan Satybaldynyń tóraǵalyǵymen ótken apparat otyrysynda keńinen tarqatyldy.
Sý qoimalardyń kópshiligi jóndeýden ótpegendikten tozyǵy jetken. Jalpy 41 sý qoimanyń ishinde 21 qoima jóndeýden ótken bolsa, 4 jańa qoima bar. Qalǵan 16 sý qoima jóndeýdi talap etedi. Oblys ákimi turǵyndardyń qaýipsizdigi basty nazarda bolýy tiis ekenin jetkizdi.
«Sý tasqyny men seldiń aldyn alý – mańyzdy másele. Bul túitkil baqylaýda bolýy tiis. Tótenshe jaǵdai departamenti birneshe basqarmamen birlesip, «2021-2023 jyldarǵa arnalǵan sý tasqynyna qarsy is-sharalar kesheni» Jol kartasyn taǵy da júieleýi kerek. Qansha qarjy kerek, qai aýmaqtardaǵy sý nysandary birnshi jóndelý qajet ekenin saralap, bul máseleni júieli túrde shesheiik», – dedi D.Satybaldy.
Túrkistan oblysynyń tótenshe jaǵdailar departamentiniń bastyǵy Nurǵali Júnisovtiń aitýynsha, 7 sý qoimany shuǵyl túrde kóp faktorly zertteýden ótkizip, qajetti jóndeý jumystaryn júrgizý qajet. Syrǵyma jáne sel qaýipti aimaqtarǵa 593 zertteý júrgizilgen.
Óńir basshysy sý tasqynyna qarsy qaýipsizdik sharalaryn turaqty qadaǵalaýda ustaýdy tapsyrdy.
Apparat otyrysynda Oblystyq sáýlet jáne qala qurylysy basqarmasynyń basshysy Nurlyjan Býkebaevtiń baiandamasy tyńdaldy. Ol oblystaǵy aýdan, qalalardaǵy injenerlik jeliler jónindegi derekterdi tsifrlandyrý jáne túgendeý jumystary týraly baiandady. «Tsifrlandyrý, ǵylym men innovatsiia esebinen tehnologiialyq serpilis» ulttyq jobasyn iske asyrý kórsetkishteriniń biri – eldi mekenderdiń injenerlik jelilerin tsifrlandyrý. Oblysta jalpy 12 aýdan ortalyqtary boiynsha jumystar bastalyp, 1 aýdanda jumys tolyq aiaqtalǵan. Óńir basshysy osy baǵyttaǵy jumysty kúsheitýdi aityp, jaýapty basshylarǵa tapsyrmalar berdi.
