Búgin Túrkistan qalasyndaǵy «Olympic center» sport saraiynda alǵash ret qazaqtyń ulttyq kúresinen «Turan Barysy» Aziia Kýbogy bastaldy.
Jarysqa Túrki memleketteri uiymynyń músheleri – Túrkiia, Ózbekstan, Ázirbaijan, Qyrǵyzstan, Majarstan jáne Qazaqstan balýandary qatysyp jatyr. Dúbirli synnyń ashylý saltanatynda QR Mádeniet jáne sport ministri Dáýren Abaev Túrkistan tórindegi jarystyń mańyzyna toqtaldy. Ulttyq sportty damytýǵa ministrlik tararynan qoldaý árdaiym jalǵasa beretinin jetkizdi.
Túrkistan oblysynyń ákimi Darhan Satybaldy sportshylar men jankúierlerdi quttyqtady.
«Túrki áleminiń rýhani astanasy – Túrkistan tórinde bastaý alǵan «Turan barysy» dodasyna qosh keldińizder. Bul Aziia kýbogyna 6 elden eń myqty balýandar keldi. Ózderińizge belgili, ulttyq sportymyz – qazaq kúresinen Álem, Aziia, Afrika jáne Eýropa chempionattary ótkizilip, damýdyń jańa deńgeiine kóterildi. «Qazaqstan barysy», «Eýraziia barysy» jáne «Álem Barysy» dodalary da búginde kórermen kózaiymyna ainalyp otyr. Búgin qasietti Túrkistan qalasynda eresekter arasyndaǵy qazaq kúresinen «Turan Barysy» Aziia kýbogy bastalǵaly jatyr. Bul dodalar halyq arasynda salaýatty ómir saltyn nasihattaýǵa serpin beredi. sporttyq dástúr men ádet-ǵuryptardy saqtaýǵa ózindik zor úlesin qosýda. Biz ulttyq sportymyzǵa qoldaý kórsetýge árqashan daiynbyz. Aziia kýbogyna qatysýshylar men ulttyq sport janashyrlaryna Túrkistan oblysynyń halqy atynan sáttilik tilep, shynaiy alǵysymdy bildiremin», – dedi Darhan Satybaldy.
Dúbirli dodaǵa túrki elleriniń eń myqty sportshylary qatysýda. Olardyń arasynda qazaq kúresimen qosa dziýdodan, sambo men kýrashtan halyqaralyq jarystarda júlde alyp júrgen sportshylar bar. Ázirbaijan quramasy atynan sambodan eki dúrkin álem chempiony Eivaz Baqshiev (60 kg) baq synaidy. Majarstan quramasy sapynda dziýdodan Eýropa chempiony Endre Gýnich (82 kg), dziýdodan Álem chempionatynyń kúmis júldegeri, Eýropanyń úsh dúrkin chempiony Barna Booýr (+90 kg) Aziia Kýbogynda jeńis tuǵyrynan kórinýge úmitti. Al túrkiialyq Fýrkan Gúner – dziýdodan Eýropa chempiony atanǵan myqty sportshy.
Ózbekstan balýandary qazaq kúresinen ótip júrgen halyqaralyq jarystarda jaqsy óner kórsetip júr. Qurama sapynda kýrashtan álem chempiony Ýmid Esanov (82 kg), kýrashtan álem chempiony, dziýdodan Aziia chempiony Erkin Kozokov (90 kg), kýrashtan úsh dúrkin álem chempiony, qazaq kúresinen eki dúrkin álem chempiony Mýhsin Hisomiddinov (+90 kg) bar.
Aziia Kýbogynda qazaq balýandaryna da úlken úmit artylyp otyr. Qazaqstan sapynda 90 keli salmaqta beldesetin Aidarbek Toqtarbek 2021 jyly qazaq kúresinen álem chempiony atandy. 90 keliden joǵary salmaqta Ǵalymjan Qyryqbai «Qazaqstan barysy» respýblikalyq týrniriniń 2021 jylǵy kúmis, 2022 jylǵy qola júldegeri.
Týrnir elimizdegi ulttyq sport túrin damytý jáne qoldaý maqsatynda ótkiziledi. Budan bólek, «Turan Barysy» jastardy sportqa tartý jáne ulttyq salt-dástúrlerdi saqtaý mindetin alǵa qoiady.
Aitýly is-shara QR Mádeniet jáne sport ministrligi men Túrkistan oblysy ákimdiginiń, sondai-aq, «Qazaq kuresi» assotsiatsiiasy, «Qazaqstan Barysy» qazaq kúresin qoldaý jáne damytý qorynyń uiymdastyrýymen ótedi. Týrnirdiń bas seriktesteri – «Samuryq-Qazyna» UÁQ AQ jáne «Týrizm men sportty qoldaý jáne damytý qory».
Týrnir «Qazsport» jáne «TRT Avaz» telearnalarynan tikelei efirde kórsetilip jatyr.
