Túrkistan qalasynda bokstan Olimpiada chempiony Bekzat Sattarhanovty eske alýǵa arnalǵan dástúrli XIH halyqaralyq týrnir bastaldy, dep habarlaidy Túrkistan oblysy ákiminiń baspasóz qyzmeti.
Jarystyń ashylý saltanatynda Túrkistan oblysynyń ákimi Ómirzaq Shókeev quttyqtaý sóz sóiledi.
«Boks sporty jastarymyzdy qaisarlyqqa, patriottyq rýhyn qalyptastyrýǵa, ózara qarsylastaryn qurmetteýge, dostyq qatynasty qalyptastyrýǵa zor septigin tigizedi. Elimiz Táýelsizdigin alǵaly beri elimizde sporttyń boks túri qarqyndy damýda. Sportshylarymyz halyqaralyq arenalarda kók týymyzdy jelbiretip, Olimpiada oiyndary men Álem jáne Aziia chempionattarynyń jeńimpazdary jáne júldegerleri atandy. Jarysqa qatysýshy boksshylarǵa sáttilik tilei otyryp, sharshy alańda tek myqtylardyń jeńip shyǵýyna tilektespin», – dedi oblys ákimi Ómirzaq Estaiuly.
Bekzattyń anasy Sarlykúl Sattarhanova batyr uly týraly estelik aityp, jarysty uiymdastyrýshylarǵa alǵys bildirdi. Saiysqa arnaiy qatysqan sportshylar Bekzattai batyr máńgi el esinde saqtalatynyn jáne oǵan degen qurmet árdaiym joǵary bolatynyn aitty.
Túrkistan tórindegi dodaǵa Qytai men Ózbekstan elderinen jáne elimizdiń barlyq óńirinen 130-ǵa jýyq sportshy keldi. Olarǵa 11 salmaq dárejesinde júldeder tapsyrylady. Jarys kezinde barlyq karantin talaptary qatań saqtalady. Qatysýshylardyń dene qyzyýy tekserilip, araqashyqtyq saqtalǵan.
Bul jarysqa bokstan 2002-2004 jyldary týǵan jastar saiysqa túsip jatyr. Jarys jeńimpazy atanǵan sportshyǵa «Sport sheberi» ataǵy beriledi.
Sidnei Olimpiadasynyń jeńimpazy, 1-dárejeli «Barys» ordeniniń iegeri, Qazaqstan Respýblikasyna eńbegi sińgen sport sheberi Bekzat Sattarhanovty eske alýǵa arnalǵan jastar arasyndaǵy bokstan XIH halyqaralyq týrniri naýryzdyń 20-na deiin jalǵasady. Saiys jeńimpazdary sáýir aiynda Polshada ótetin álem chempionatyna joldama alady.
Túrkistan oblysynyń boksshylary Qazaqstanda úzdikter qatarynda tur. Óńirde 8 oblystyq, 18 qalalyq jáne 7 aýdandyq sport mektepterinde boks bólimderi jumys isteidi. Onda 252 jattyqtyrýshy 6 myńnan astam balaǵa oqý-jattyǵý jumystaryn júrgizedi.
Bokstan eresekter arasynda halyqaralyq, respýblikalyq týrnirler jyl saiyn ótedi. Sondai-aq, el chempionattary men birinshilikterine Túrkistan oblysynyń irikteý saiystary ótkiziledi.
