Búgin Túrkistan oblysy jaýyngerlik óner qaýymdastyǵynyń qurmetti prezidenti Ábilseiit Dúisebaev túrkistandyq sportshylardy qabyldady, dep habarlaidy «Ult aqparat» Túrkistan oblysy ákimdiginiń baspasóz qyzmetine silteme jasap.
Jýyrda Armeniianyń astanasy Erevanda ótken sporttyq sambo jáne jaýyngerlik sambo kúresinen jáne Bolgariianyń Sofiia qalasynda áielder kúresinen jastar arasynda ótken Álem chempionatynyń júldegerlerin jeńisterimen quttyqtap, alǵys bildirdi.
«Túrkistan oblysynda 3 jylǵa jaqyn ýaqyt aralyǵynda Olimpiadalyq emes sport túrlerin damytýda aýqymdy jumystar atqarylyp, tolaǵai tabystarǵa qol jetkizdik. Sportshylardyń juldyzy janyp, biik belesterdi baǵyndyrý jolynda bapkerlerdiń de eńbegi orasan. Búgingi basqosýdyń maqsaty – úzdik sportshylardy marapattaý, olarǵa laiyqty qurmetke kórsetý», – dedi QR UQK Túrkistan oblysy boiynsha departamentiniń bastyǵy, general-maior Ábilseiit Orazaqynuly.
Olimpiadalyq emes sport túrleri boiynsha óńir sportshylary 9 aida eleýli tabystarǵa qol jetkizip, el mereiin ústem etti. Aita keter bolsaq, aǵymdaǵy jyldyń 9 aiynda Álem chempionattarynda – 19 altyn, 24 kúmis, 18 qola, Aziia chempionattarynda – 7 altyn, 5 kúmis, 4 qola, QR chempionattarynda – 59 altyn, 32 kúmis, 51 qola medal enshiledi.
Eske salsaq, Armeniianyń astanasy Erevanda sambo kúresinen jasóspirimder arasyndaǵy Álem chempionatynda Ulbolsyn Ádilova men Dinmuhammed Ergeshbaev kúmis júldeger, Nurhan Jamalhan jáne Nýrila Asanqyzy qola júldegeri atandy. Sondai-aq Astana qalasynda belbeý kúresinen ótken jastar arasyndaǵy Álem chempionatynda Beknur Qýandyq kúmis júldege ie bolsa, Bolgariianyń Sofiia qalasynda áielder kúresinen jastar arasynda ótken Álem chempionatynda Madina Aman qola júldege qol jetkizdi.
Túrkistan oblystyq jaýyngerlik óner qaýymdastyǵynyń basshysy Dáýren Táńirbergenovtiń aitýynsha, assotsiatsiia ujymy úshin biylǵy jyl da jemisti bastaldy. Keler jyly da sportshylar budan da jaqsy nátijege qol jetkizedi degen senim mol.
