Túrkistan qalasynda 5 adamnyń ólimine qatysy bar eki JShS direktory 4 jylǵa bas bostandyǵynan aiyryldy, dep habarlaidy QazAqparat tilshisi.
Eske sala keteiik, ótken jyldyń aqpan aiynda ýly gazdan ýlaný saldarynan áiel men onyń kámeletke tolmaǵan 4 balasy qaza tapqan bolatyn.
Kópbalaly ana 41 jasta edi. Al, eń kishi balasy 4 jasta.
Tótenshe oqiǵadan tek Shymkentte em qabyldap jatqan otaǵasy ǵana aman qaldy.
Atalǵan is boiynsha tergeý shamamen jeti aiǵa sozyldy. Túrli saraptamalar júrgizilip, dálelder jinaqtaldy.
Nátijesinde aiyptaý aktisi bar is sotqa joldanǵan bolatyn.
«Bolashaqta mundai qaiǵyly jaǵdaidy boldyrmaý men aldyn alý úshin biz atalǵan is boiynsha muqiiat jumys istedik. QR QK 306-baby 3-bóligi boiynsha sotqa deiingi tergeý júrgizildi. Birden sot-tehnologiialyq saraptama taǵaiyndadyq. Nátijesinde mamandar gaz jelilerin ornatý jáne montajdaý 4.03-01-2011 j. QR qurylys normalaryna sáikes kelmeidi degen qorytyndy berdi. Iaǵni, gaz jabdyqtaryn ornatý kezinde jaýapty mamandar birqatar qatelik jibergen. Eń bastysy, tutynýshylardyń qaýipsizdigi qamtamasyz etilmegen, al bul árine, adam ólimine alyp keledi», - dedi oblystyq politsiia departamenti tergeý basqarmasynyń bastyǵy, politsiia polkovnigi Nurmahan Jalǵasov.
Túrkistan qalasynyń soty atalǵan is boiynsha úkim shyǵardy. Eki birdei gaz kompaniiasynyń direktory 4 jylǵa bas bostandyǵynan aiyryldy.
