Túrkistan óńirine Qyrǵyz eliniń teatr sańlaqtary gastroldik saparmen keldi. Túrkistan mýzykalyq drama teatrynyń sahnasynda T.Abdýmomýnov atyndaǵy Qyrǵyz ulttyq akademiialyq drama teatry «Eńlik-Kebek» shyǵarmasyn qoidy.
Zamananyń zańǵar jazýshysy Muhtar Áýezovtiń 125 jyldyǵyna orai, sonymen qatar Qyrǵyzstannyń Halyq ártisi Núrken Tursynbaevtyń 80 jyldyǵy aiasynda ótken keshke TÚRKSOI halyqaralyq uiymynyń Bas hatshysy Sultan Raev arnaiy qatysty.
«Qazaq pen qyrǵyz bir týǵan el. Bizge uly óner men mádeniet te, ádebiet te ortaq. Búgingi qoiylymnyń avtory, qazaq halqynyń jazýshysy Muhtar Áýezovti qyrǵyz jurty da erekshe qurmetteidi. Birinshiden, «Manas» jyrynyń saqtalýyna úlken septigi tidi. Ekinshiden, Shyńǵys Aitmatovty álemge tanytqan tulǵa», – degen Bas hatshy qos teatrǵa arnaiy syi tapsyrdy. Al Túrkistan oblystyq mádeniet basqarmasy basshysynyń orynbasary Ádil Nurjanuly Túrkistan tórinde óner kórsetken qyrǵyz aǵaiyndarǵa alǵys bildirip, túbi bir túrki elderi arasyndaǵy osyndai qadamdar ózara yntymaqtastyq pen mádeni-rýhani bailanysty nyǵaitýǵa, ónerpazdardyń tájiribe almasýyna yqpal etedi dedi.
Qoiýshy-rejisseri – Qyrǵyz Respýblikasynyń eńbek sińirgen ártisi N.Mendebairov. Qoiylymda XVII ǵasyrda ómir súrgen qos ǵashyqtyń móldir mahabbaty, Kebek pen Eńliktiń arasyndaǵy sezim, rýaralyq qaqtyǵystar, Nyshan atty abyz áýlieniń hikaianyń sońyn boljaǵan kóregendigi, kikiljińnen paida izdegen eki rý bileriniń jaýyzdyǵy, sondai-aq Eńlikti kútip otyrǵan Japal atty jetim qoishynyń armany beinelengen.
