Búgin oblys ortalyǵyndaǵy «Kongress Holl» kópsalaly kesheninde «Túrkistan - rýhani, qaýipsiz qala» taqyrybynda forým ótti. Atalǵan forým Túrkistan oblysy Politsiia departamentiniń bastamasymen, Túrkistan oblysy qoǵamdyq damý basqarmasynyń qoldaýymen uiymdastyryldy.
Túrkistan qalalyq Politsiia basqarmasynyń basshysy Baýyrjan Janaevtyń málimdeýinshe, qalada «Túrkistan – qaýipsiz qala» baǵdarlamasyn iske asyrý nátijesinde qylmystar sany tómendegen. Máselen, «Kerýen sarai» saýda ári oiyn-saýyq kesheniniń basshylyǵymen jáne «Birlik» móltek aýdanyndaǵy kafe ielerimen kezdesip, qaýipsizdikti saqtaý boiynsha birlese jumys isteýge kelisimge kelgen. Servistik politsiia modelin qalyptastyrý maqsatynda «Qaýipsiz qala», «Qaýipsiz jol» is-sharalaryn turaqty túrde ótkizip, reidter uiymdastyrylǵan. Bul jumystar óz jemisin berýde.
«Túrkistan shaharynda turǵyndarmen ashyq ári tyǵyz bailanys ornatý, «servistik politsiia» tujyrymdamasyn júzege asyrý baǵytynda júieli jumys atqarylyp jatyr. Túrkistan oblystyq politsiia departamenti basshylyǵynyń tapsyrmasyna sáikes, turǵyndardyń qaýipsizdigi men quqyǵyn qorǵaý jumystary kúsheitile tústi. Qoǵamdyq tártipti saqtaý, turaqtylyqty tý etý basty orynǵa shyqty. Shaharda «Azamattarǵa arnalǵan qabyldaý» front-keńsesi jumys istep tur. Jańa ortalyqtyń ashylýy arqyly politsiia qyzmetkerleri halyqpen tyǵyz qarym-qatynas ornatýdy kózdeidi. Keńes berip, jańa formatta jumys isteýde. Sonyń biri – aryz, shaǵymdardy beinejazý arqyly qabyldaý. Arnaiy tehnikamen jaraqtalǵan bólme bar, sol jerde shaǵymdanýshynyń sózin, aiǵaq zattaryn taspaǵa basyp alýǵa bolady. Bul óz kezeginde is qaǵazdarynyń burmalanbaýyna áser etetin birden-bir faktor», – dep atap ótti qalanyń bas politseii.
Atalmysh forýmǵa sportshy, erejesiz jekpe-jekten álemniń úsh dúrkin chempiony Ardaq Nazarov, mediaekspert, jýrnalist Órken Kenjebek, sarapshy, jýrnalist Nurdilda Oraz, kásipker, Memlekettik «Daryn» jastar syilyǵynyń laýreaty Oljas Súleimenov, ánshi, sportshy Eskendir Ibragim arnaiy spiker retinde keldi.
Sahna tórine shyqqan spikerler rýhani astana atanyp kele jatqan oblys ortalyǵyn qaýipsiz qala etý tóńireginde ózderiniń pikirlerin jetkizip, kórermendermen pikir almasty.
Forým sońynda Túrkistan qalalyq Politsiia basqarmasynyń basshysy turǵyndardy qoǵam tynyshtyǵyn birlese qamtamasyz etýge shaqyrdy.
«Túrkistan – rýhaniiat ortalyǵy ári qaýipsiz qala. Biz osy ustanymdy júzege asyrý úshin bar kúsh-jigerimizdi salýymyz kerek. Bul rette, kieli shahardyń tártip saqshylary ózderine júktelgen mindetter men Prezident, ministrlik tapsyrmalaryn buljytpai oryndaýǵa kúsh salyp keledi. Biz úshin basty qundylyq – adam men onyń quqyǵy. Barsha áriptesterimizdi, Túrkistan turǵyndaryn bizben birlese jumys istep, qoǵam tynyshtyǵyn qamtamasyz etýge shaqyramyn. Qoǵam men memlekettik mekemeler ózara úilesimdi bailanys ornatsa ǵana memleketimiz damidy», – dedi qorytyndy sózinde B. Janaev.
Aita ketsek, búginde Túrkistan qalasynyń Politsiia basqarmasynda 500-den asa qyzmetker eńbek etýde, onyń ishinde 103 ýchaskelik politsiia jáne 214 patrýldik inspektorlary qoǵam tynyshtyǵyna úles qosýda.
