Jetisai aýdany Qyzylqum eldi mekeniniń turǵyny Arai Asylbekqyzy jastaiynan traktor júrgizedi, dep habarlaidy "Ult aqparat".
Ol 11 jasynan bastap aýyr tehnikany tizgindep úirengen.
Búginde traktordyń kómegimen aýyldastarynyń egistik jerlerin jyrtyp, tabys ta taýyp júr.
«Kishkentai kúnimnen jeńil kólikke qaraǵanda, osy tehnikaǵa degen qyzyǵýshylyǵym arta tústi. Osyndai ereksheligimdi baiqaǵan ákem men aǵalarym betimnen qaqpai, kerisinshe traktor júrgizýdiń qyr-syryn úiretti. Sol úshin olarǵa sheksiz alǵysymdy aitamyn. Mine, sonyń arqasynda kúnine 10 gektarǵa deiin egistik jerin jyrtyp, diqandarǵa kómegim tiip keledi. Kúndelikti isim osy bolǵan soń, traktordyń az-kem tehnikalyq aqaýlaryn jóndeýdi de úirenip aldym», – deidi Arai Asylbekqyzy.
Qazirgi tańda Túrkistan qalasyndaǵy joǵary oqý oryndarynyń birinde oqityn 1-kýrs stýdentin aýyl arasynda «traktorshy qyz» dep te ataidy eken.
Onyń bilim alyp júrgen negizgi mamandyǵy - tis dárigeri.
