Túrkistan oblysynyń politsiiasy jýrnaliske jasalǵan qastandyq týraly istiń mán-jaiyn jariialady.
Buǵan deiin áleýmettik jelide 2022 jyldyń 3 qańtarynda Túrkistan oblysy Saryaǵash aýdanynda tanymal jýrnalistiń úiine shabýyl jasalǵany, oqiǵa kezinde onyń uly jaralanǵany habarlandy, dep jazady Sputnik Kazakhstan.
Sol kúni politsiia bul faktini tirkep, qylmystyq kodekstiń 24-99 baptary "adam óltirýge oqtalý" boiynsha sotqa deiingi tergeýdi bastady.
"Qylmysty ashýda birqatar nusqany negizge aldyq. Jýrnalistiń kásibi qyzmetine bailanysty osy qylmystyń jasalýy múmkin ekeni de eskerildi. Keiinnen osy nusqa rastaldy", - dedi Túrkistan oblysy politsiia departamentiniń bastyǵy Qairat Dálbekov.
Izdestirý sharalary barysynda Shymkent qalasynyń eki turǵyny ustaldy.
"Olar oq atyp, oqiǵa ornynan qashyp ketken. Sodan keiin politsiia qyzmetkerleri deldaldar men qylmysty tapsyrys berýshilerge shyqty. Búgingi tańda biz osy qylmysqa qatysy bar 5 kúdiktini ustadyq. Zattai aiǵaq retinde olardan VAZ markaly 2 avtokólik tárkilendi. Qylmysty oryndaýshylar bul avtokólikterdi qylmysty jasaǵany úshin alǵan aqshaǵa satyp alǵan. Sondai-aq olardan 16 kalibrli patrondar tárkilendi", - dedi departament bastyǵy.
Onyń sózinshe, Saryaǵash aýdany turǵyndarynyń biri qylmysqa tapsyrys bergen. Onyń aty-jóni atalmady.
"Ol jýrnalistiń ómirin 5 000 000 teńgege baǵalaǵan. Qylmysty oryndaýshylar izin jasyrý maqsatynda tapsyrysty oryndap, Saryaǵash aýdanynan Shardaraǵa, sodan soń Arys arqyly Shymkentke jetken", - dep naqtylady Dálbekov.
Qazir tergeý toby tiisti tergeý amaldaryn júrgizip jatyr. Sotqa deiingi tergeý barysynda qylmystyń sebebi men barlyq mán-jaiy anyqtalady.
Kúdiktiler ýaqytsha ustaý izoliatoryna qamaldy.
