تٷركٸستان وبلىسىنىڭ پوليتسيياسى جۋرناليسكە جاسالعان قاستاندىق تۋرالى ٸستٸڭ مەن-جايىن جارييالادى.
بۇعان دەيٸن ەلەۋمەتتٸك جەلٸدە 2022 جىلدىڭ 3 قاڭتارىندا تٷركٸستان وبلىسى سارىاعاش اۋدانىندا تانىمال جۋرناليستٸڭ ٷيٸنە شابۋىل جاسالعانى, وقيعا كەزٸندە ونىڭ ۇلى جارالانعانى حابارلاندى, دەپ جازادى Sputnik Kazakhstan.
سول كٷنٸ پوليتسييا بۇل فاكتٸنٸ تٸركەپ, قىلمىستىق كودەكستٸڭ 24-99 باپتارى "ادام ٶلتٸرۋگە وقتالۋ" بويىنشا سوتقا دەيٸنگٸ تەرگەۋدٸ باستادى.
"قىلمىستى اشۋدا بٸرقاتار نۇسقانى نەگٸزگە الدىق. جۋرناليستٸڭ كەسٸبي قىزمەتٸنە بايلانىستى وسى قىلمىستىڭ جاسالۋى مٷمكٸن ەكەنٸ دە ەسكەرٸلدٸ. كەيٸننەن وسى نۇسقا راستالدى", - دەدٸ تٷركٸستان وبلىسى پوليتسييا دەپارتامەنتٸنٸڭ باستىعى قايرات دەلبەكوۆ.
ٸزدەستٸرۋ شارالارى بارىسىندا شىمكەنت قالاسىنىڭ ەكٸ تۇرعىنى ۇستالدى.
"ولار وق اتىپ, وقيعا ورنىنان قاشىپ كەتكەن. سودان كەيٸن پوليتسييا قىزمەتكەرلەرٸ دەلدالدار مەن قىلمىستى تاپسىرىس بەرۋشٸلەرگە شىقتى. بٷگٸنگٸ تاڭدا بٸز وسى قىلمىسقا قاتىسى بار 5 كٷدٸكتٸنٸ ۇستادىق. زاتتاي ايعاق رەتٸندە ولاردان ۆاز ماركالى 2 اۆتوكٶلٸك تەركٸلەندٸ. قىلمىستى ورىنداۋشىلار بۇل اۆتوكٶلٸكتەردٸ قىلمىستى جاساعانى ٷشٸن العان اقشاعا ساتىپ العان. سونداي-اق ولاردان 16 كاليبرلٸ پاتروندار تەركٸلەندٸ", - دەدٸ دەپارتامەنت باستىعى.
ونىڭ سٶزٸنشە, سارىاعاش اۋدانى تۇرعىندارىنىڭ بٸرٸ قىلمىسقا تاپسىرىس بەرگەن. ونىڭ اتى-جٶنٸ اتالمادى.
"ول جۋرناليستٸڭ ٶمٸرٸن 5 000 000 تەڭگەگە باعالاعان. قىلمىستى ورىنداۋشىلار ٸزٸن جاسىرۋ ماقساتىندا تاپسىرىستى ورىنداپ, سارىاعاش اۋدانىنان شارداراعا, سودان سوڭ ارىس ارقىلى شىمكەنتكە جەتكەن", - دەپ ناقتىلادى دەلبەكوۆ.
قازٸر تەرگەۋ توبى تيٸستٸ تەرگەۋ امالدارىن جٷرگٸزٸپ جاتىر. سوتقا دەيٸنگٸ تەرگەۋ بارىسىندا قىلمىستىڭ سەبەبٸ مەن بارلىق مەن-جايى انىقتالادى.
كٷدٸكتٸلەر ۋاقىتشا ۇستاۋ يزولياتورىنا قامالدى.
