Túrkistan oblysynda 8 aýyl sharýashylyǵy kásiporny 380 million teńge kólemindegi zańsyz sýbsidiiany ielengen, dep habarlaidy QazAqparat.
Qarjy monitoringi agenttigi taratqan málimetke sensek, sońǵy bes jylda aýyl sharýashylyǵyn damytýǵa memlekettik biýdjetten 2 trln teńgeden astam qarajat bólingen.
Oǵan qaramastan, aýyl sharýashylyǵy kásiporyndaryna memlekettik sýbsidiia retinde bólingen biýdjet qarajatyn jymqyrý derekteri de bar.
Máselen, Qarjylyq monitoring agenttiginiń Túrkistan oblysy boiynsha aýmaqtyq departamenti 8 sharýa qojalyǵynyń basshylaryna qatysty sýbsidiiany zańsyz ielený deregi boiynsha qylmystyq is qozǵady.
Sharýa qojalyq basshylary «Sybaǵa» memlekettik baǵdarlamasy aiasynda sýbsidiia alýǵa ótinim bergen kezde jalǵan málimetterdi kórsetken.
Atap aitqanda, olar Resei Federatsiiasynan iri qara mal satyp alýdy jáne ákelýdi rastaityn jalǵan qujattardy usynǵan.
QR AShM Veterinarlyq baqylaý jáne qadaǵalaý komitetiniń oblystyq inspektsiiasynyń derekterine sáikes atalǵan zańdy tulǵalar iri qara mal satyp alýǵa ótinim jibermegen jáne olardy RF-dan ákelý boiynsha baǵyttyq qaǵazdardy alǵan joq.
Atalǵan sharýa qojalyqtaryna zańsyz tólengen sýbsidiianyń jalpy somasy 380 million teńgeni qurady, al nesieniń jalpy somasy 1 milliard teńgeden asty.
