Memleket basshysy jariialaǵan «Qoqyssyz tabiǵat» jalpyulttyq aktsiiasy jáne 25 qazan – Respýblika kúnine orai Túrkistan oblysynda ekologiialyq senbilik ótti, dep habarlaidy «Ult aqparat» Túrkistan oblysynyń Óńirilik kommýnikatsiialar qyzmetine silteme jasap.
Aktsiianyń basty maqsaty – ekologiialyq mádenietti qalyptastyrý jáne turǵyndardy qorshaǵan ortany lastamaýǵa, tazalyqty saqtaýǵa shaqyrý.
Mańyzdy memlekettik mereke qarsańynda óńirdegi myńdaǵan azamat qoldaryna qajetti qural-saimandaryn ustap senbilikke shyqty. Tazalyq sharasyna oblystaǵy aýdan, qalalar men aýyl okrýgterindegi mekeme ujymdary, belsendi jastar men eriktiler jumyla atsalysty. Senbilikke qatysýshylar týristik aimaqtardy jáne kósheler men saiabaqtardy, aryq-atyzdardy qoqystan tazartyp, arnaiy orynǵa shyǵardy.
Aýqymdy aktsiiaǵa Túrkistan oblysy qoǵamdyq damý basqarmasynyń «Jastar resýrstyq ortalyǵy» KMM-niń qyzmetkerleri de belsene atsalysty. Ortalyqtyń basshysy Erasyl Tólebaevtyń aitýynsha, búgingi aktsiiaǵa óńirdegi úsh myńnan asa erikti jas qatysqan.
«Tazalyqtan tán de, jan da tazarady. Óńirimizde týǵan jerdiń tazalyǵyna beijai qaramaityn azamattardyń qatary artyp kele jatqany qýantady. Ekologiialyq aktsiia barysynda jastar týristik nysandarǵa barar joldar men saiabaqtarǵa sanitarlyq tazalyq jumystaryn júrgizdi. Jalpy, Túrkistan oblysynyń ekologiialyq jaǵdaiyn jaqsartý maqsatynda igilikti ister júzege asýda. Máselen, oblys ortalyǵynda 7700 ga jerge «Jasyl beldeý» qurý josparlanyp, búgingi tańda barlyǵy 13 629 ga jerge kóshetter egilip, kútip-baptalýda. Aldaǵy ýaqytta «Jasyl beldeý» aýmaǵyn 30 myń gektarǵa jetkizý kózdelýde. Tazalyq – adamnyń rýhani, mádeni jetilý deńgeiiniń mańyzdy kórsetkishiniń biri ekenin eskersek, senbilikte ǵana emes, ár kúni ainalymyzdy taza ustaýǵa atsalysaiyq», – deidi ol.
Senbiliktiń arqasynda oblys aýmaǵy tazaryp, kósheleri kóriktenip, ajarlana tústi. Atalǵan aktsiia óńirde aldaǵy ýaqytta da jalǵasady.
Eske sala ketsek, Memleket basshysynyń 2 mlrd ártúrli aǵash kóshetterin otyrǵyzý tapsyrmasyna sáikes, Túrkistan oblysy boiynsha 5 jylda 132 myń gektar jerge 210 mln-nan asa aǵash kóshetterin otyrǵyzý jumystary atqarylýda.
