Túrkistan oblysynda Respýblika kúnine orai 1200-den astam mańyzdy is-shara ótip jatyr. Bul týraly búgin óńirlik komýnikatsiia qyzmetinde ótken brifingte Túrkistan oblysy qoǵamdyq damý basqarmasynyń basshysy Ańsar Óserbaev málim etti.
Basqarma basshysynyń málimdeýinshe, oblysta Respýblika kúnin atap ótýde eldik pen birlikti dáripteitin qaiyrymdylyq, ekologiialyq jáne patriottyq aktsiialarǵa basymdyq berilýde.
Sondai-aq merekeniń mán-mańyzyn aishyqtaý baǵytynda saltanatty jiyndar, kontserttik baǵdarlama, teatrlandyrylǵan qoiylym, dóńgelek ústel, kitaphana kórmeleri men mýzeilerde ekskýrsiia, sporttyq sharalar t.b. aýqymdy sharalar ótkizilmek.
«Memleket basshysy biyl 16 maýsymda Ulytaýda ótken Ulttyq quryltaida Respýblika kúni mártebesin qaita qalpyna keltirýdi jáne ony 25 qazanda Ulttyq mereke retinde atap ótýdi usynǵan bolatyn. Osy rette, Ulttyq merekeniń tujyrymdamasy negizinde oblysta 30 is-sharadan turatyn jospar bekitilip, aýdan, qalalarda ótetin 1200-den astam sharanyń 614-i ótkizildi. Igilikti ister jalǵasyp jatyr. Mereili mereke barysynda aýdan, qalalarda ár saladaǵy eńbek sińirgen qyzmetkerler, eńbek ardagerleri, erlik kórsetken azamattar marapattalatyn bolady. Sonymen birge, mereke kúni oblys boiynsha 7 430 orynǵa arnalǵan 7 jańa mektep jáne sport kesheni siiaqty mańyzdy nysandar halyq igiligi úshin paidalanýǵa berilmek. Budan bólek, jańa alleialar ashylyp, turǵyn úiler beriledi, birqatar aýyldyq okrýgte taza aýyzsý jáne tabiǵi gaz iske qosylady», – dedi Ańsar Jańabaiuly.
Sondai-aq basqarma basshysy mereke qarsańynda oblystaǵy túrli etnos ókilderi tarapynan ázirlengen «Meniń Otanym - Meniń Qazaqstanym» patriottyq chellendji aiasyndaǵy beinequttyqtaý Qyzylorda oblysyna joldanǵanyn atap ótti. Osy taqyryptaǵy «Oblystyq jastar resýrstyq ortalyǵy» KMM-i daiyndaǵan videoquttyqtaý kórshi Jambyl oblysyna joldanǵan.
Ańsar Jańabaiulynyń aitýynsha, mereke sheńberinde qaiyrymdylyq aktsiialary uiymdastyrylmaq. Atalǵan ideiany iske asyrýǵa jergilikti biznes ókilderi, demeýshiler men metsenattardy tara otyryp «Janashyr júrek» aktsiiasy bastaý aldy.
Sonymen qatar, media-josparǵa sáikes, «Respýblika maqtanyshy» aidary aiasynda óńirdiń damýyna eńbek sińirgen qairatkerler týraly maqalalar, estelikter oblystaǵy gazet-jýrnaldarda jariialaý jumysy belsendi júrgizilýde. Respýblika kúni merekesiniń tarihy men mańyzdylyǵy týraly beinerolikter men telehabarlar ázirlenip, áleýmettik jeliler men messendjerlerde ornalastyrylýda.
Brifing barysynda Túrkistan oblysy mádeniet basqarmasy basshysynyń orynbasary Asylhan Temirhan mádeni is-sharalar týraly baiandady.
Onyń aitýynsha, 19-20 qazan kúnderi «Kongress Holl» kesheninde halyqaralyq «Voice of Turan» qazaq ánderi baiqaýy ótedi. Sondai-aq 22 qazan kúni «Jasa, jaina Qazaqstan!» saltanatty is-sharasy uiymdastyrylmaq.
«Oblystyq kitaphanalarda ulttyq mereke keń kólemde atalyp ótpek. Y.Altynsarin atyndaǵy balalar kitaphanasynda 21-23 qazan kúnderi «Asqaqtai ber, aibyndy Qazaqstan!» aptalyǵy ótse, «Farab» ámbebap ǵylymi kitaphanasynda 25 qazan kúni «Respýblika kúni – ulttyq mereke» atty merekelik is-sharasy jáne kitap kórmesi bolady. Sonymen qatar 22-25 qazan kúnderi oblys kólemindegi ortalyqtandyrylǵan kitaphanalar júiesinde merekelik keshter, tarihi saǵattar men keńeitilgen kitap kórmeleri ótedi, teatrlarda túrli qoiylymdar usynylady», - dedi A. Temirhan.
Mereke aiasynda oqýshylar, stýdentter jáne jastar uiymdarynyń ókilderi arasynda «Meniń armanymdaǵy Qazaqstan» taqyrybynda respýblikalyq esse konkýrsy, «TuranBalafest» úzdik ónerpazdar teleshoýy, sondai-aq Abai eskertkishiniń aldynda uly aqynnyń shyǵarmalaryn oqý, «Kúltegin» ziiatkerlik oiyn jeńimpazdaryn marapattaý rásimi ótedi.
Budan bólek, oblystyq mýzeilerde 22-25 qazan aralyǵynda merekelik kórmeler, lektsiialar, fotokórmeler, tanymdyq aqparattyq keshter ótedi. Aýdandyq, qalalyq mádeniet úileri jáne ortalyq alańdar men saiabaqtarda saltanatty is-sharalar men merekelik kontsertter uiymdastyrý josparlanýda. Sondai-aq oblys ortalyǵynda «Qazaqstan – beibitshilik mekeni» taqyrybynda sýret salý baiqaýy ótedi.
