Túrkistan oblysynyń politseileri óz balalaryn uryp-soqqan er adamdy qamaýǵa aldy, dep habarlaidy "Ult aqparat" Túrkistan oblysynyń Poliiia departamentine silteme jasap.
Esterińizge sala ketsek, politseiler 4-qazan kúni áleýmettik jelilerge monitoring júrgizý kezinde er adamnyń kámeletke tolmaǵan balany uryp-soǵyp jatqan beinejazbany anyqtady. Atalǵan jait sotqa deiingi tergeý tizilimine QR QK 110-baby 2-bóligi «Azaptaý» boiynsha tirkeldi.
Sol kúni kúdiktiniń áieli jubaiynyń óz balalaryn uryp-soqqany týraly politsiiaǵy aryzdanǵan. Politseiler jergilikti jumyssyz turǵyndy tez arada ustady. Erli-zaiyptylardyń 2011 jyldan beri nekede turǵany anyqtaldy. Ekeýiniń ortaq úsh balasy bar. Buǵan deiin áiel 2018 jyly politsiiaǵa kúieýin uryp-soǵý týraly aýyzsha aitqan, biraq ótinish berýden bas tartqan.
2019 jyldyń sáýirinde ol taǵy da politsiiaǵa dene jaraqatyn salý deregi boiynsha júgingen. Alaida, ákimshilik óndiris áiel kúieýin keshirgendikten mediatsiia arqyly toqtatyldy. Sodan keiin jubaiy qaitadan jaýapkershilikten qutyldy.
«Qazirgi ýaqytta atalǵan jait boiynsha sotqa deiingi tergeý amaldary júrgizilýde. Saraptama taǵaiyndaldy. Er adam qamaýǵa alyndy. Tergeý oqiǵanyń barlyq mán-jaiyn anyqtaýda», - delingen habarlamada.
