Foto: Túrkistan oblysy PD baspasóz qyzmetinen
Túrkistan oblysynda turǵyn 13 jastaǵy qyzdy zorlamaq bolǵan er adamdy ustap, politseilerge tapsyrdy, - dep habarlaidy Tengrinews.kz agenttigi Túrkistan oblysy PD baspasóz qyzmetine silteme jasap.
Oqiǵa Saryaǵash aýdany Darbaza aýylynda túngi ýaqytta bolǵan.
"Jasóspirim qyz otbasymen birge keshki serýenge shyqqan. Sodan qaitar sátte, qyz úiine erterek barmaqshy bolyp, ata-anasynan buryn ketip qalady. Osy sátte jalǵyz úiine qaityp bara jatqan jasóspirimniń sońynan aiaqasty belgisiz er adam erip, shashynan tartyp, shetke qarai alyp shyqqan. Onymen qoimai betinen shapalaqpen uryp, jerge qulatady. Qyz birden aiqaiǵa basady. Al kúdikti onyń aýzyn jaýyp, qylqyndyrǵan", - delingen habarlamada.
PD málimetinshe, osy kezde eki adamnyń arpalysyp jatqanyn sol mańnan áielimen birge ótip bara jatqan turǵyn baiqap, birden kómekke umtylǵan. Qyzǵa kómektesken Darbaza aýyly ákiminiń orynbasary Súiindik Seiitjapparuly bolyp shyqty.
"Keshkisin jubaiym ekeýmiz ketip bara jatyp kóshe mańynan eki adamnyń urysyp-tóbelesip jatqandai, birine kómek qajettei sezildi. Birden oqiǵa bolyp jatqan jaqqa júgirdim, alaida kúdikti meni kórdi de qashýǵa árekettendi. Biraq onyń qyzǵa tiispekshi bolǵanyn bilgennen keiin, eshteńege qaramai sońynan qýdym. 100 metrdei qýyp otyryp, aqyry ustadym. Politsiia shaqyryp, ony tapsyrdyq. Bul meniń azamattyq boryshym dep bildim. Eń bastysy qyzdyń jaǵdaiy jaqsy. Oǵan eshteńe bolmady!" - dedi ol.
Oqiǵa ornyna politseiler baryp, mán-jaidy anyqtaǵan.
"Qazir kúdikti qamaýda. Oǵan qatysty sotaldy tergeý amaldary júrgizilip jatyr. Oǵan qatysty QR QK-niń 120-baby 4-bólimi "Zorlaý", 24-baby 3-bóligi "Qylmysqa daiyndalý jáne oqtalý" boiynsha sotaldy tergeý amaldary júrgizilip jatyr. Oqiǵanyń tolyq mán-jaiy tergeý barysynda anyqtalady", - delingen PD habarlamasynda.
