Túrkistan oblysynda kóktaiǵaqtan toqtai almaǵan jeńil kólik jol jieginde turǵan politseilerdiń qyzmettik kóligin soǵyp ketti. Bul kórinis áleýmettik jelige tarap, atalǵan jazbaǵa sáikes politseiler arnaiy tekserý jumystaryn júrgizdi, dep habarlaidy "Ult aqparat".
Oblystyq PD baspasóz qyzmetiniń málimetinshe, ishki ister organdarynyń barlyq jeke quramy joldarǵa bóliný arqyly kedergilerge tap bolǵan kólikterge kómek kórsetken. Sondai sátte júrgizýshiler men jolaýshylarǵa kómek kórsetip jol jiegine qoiylǵan politseilerdiń qyzmettik kóligin jeńil avtokólik soǵyp ketken.
«Bul oqiǵa 14 naýryzynda Shymkent-Samara tasjolynyń 49-50 shaqyrymynda saǵat 17:15 shamasynda oryn alǵan. Oblystyq PD JPQ patrýldik politsiia batalonynyń politseileri ózderiniń qyzmettik kólikterimen aýa raiynyń qolaisyzdyǵyna bailanysty jerdiń taiǵaqtyǵynan joldy jaýyp qalǵan kólikterdi shyǵarǵan. Osy kezde «BMV» markaly avtokóliginiń júrgizýshisi, Shymkent qalasynyń turǵyny basqarý júiesin igere almai qalǵan. Sóitip politsiianyń eki birdei «KIA RIO» markaly qyzmettik kóligin soqqan. Adam shyǵyny joq» delingen habarlamada.
Búgingi tańda atalǵan jait tirkeýge alynyp, tekserý amaldary júrgizilýde. Júrgizýshiler tiisti meditsinalyq kýálandyrýdan ótip, onyń qorytyndysy boiynsha júrgizýshiler ishimdik ishpegeni anyqtalǵan. Sondai-aq «BMV» markaly kóliginiń iesine QR ÁQBtK-niń 610 babynyń 1-bóligimen (Kólik quraldary júrgizýshileriniń jol júrisi qaǵidalaryn adamdardyń densaýlyǵyna ziian keltirýge, kólik quraldarynyń nemese ózge de múliktiń búlinýine alyp kelgen buzýshylyǵy) hattama toltyrylǵan.
