QR Premer-Ministri Asqar Maminniń tóraǵalyǵymen Qazaqstan Respýblikasy Prezidenti janyndaǵy «Jasyl ekonomikaǵa» kóshý jónindegi keńes otyrysy ótti. Bul týraly "Ult aqparat" primeminister.kz silteme jasap habarlaidy.
Qazaqstannyń «Jasyl ekonomikaǵa» kóshýi jónindegi 2013-2020 jyldarǵa arnalǵan tujyrymdamanyń is-sharalar josparyn iske asyrý aiasynda turaqty jáne ónimdiligi joǵary aýyl sharýashylyǵyn damytý týraly QR ekologiia, geologiia jáne tabiǵi resýrstar ministri M. Myrzaǵaliev, aýyl sharýashylyǵy ministri S. Omarov, óńirlerde ekologiialyq jaǵdaidy jaqsartý jáne «jasyl ekonomikany» damytý jónindegi sharalar týraly Aqtóbe oblysynyń ákimi O. Orazalin, Mańǵystaý oblysynyń ákimi S. Trumov, Nur-Sultan q. ákimi A. Kólginov jáne Almaty q. ákiminiń birinshi orynbasary E. Qojaǵapanov baiandady. Sonymen qatar BUU Damý Baǵdarlamasynyń QR-daǵy turaqty ókili Ia. Berish túsinikteme berip ótti.
«Jasyl ekonomikaǵa» kóshý aiasynda zamanaýi sýarý júielerin engizýdi yntalandyrý maqsatynda AÓK sýbektilerine infraqurylymdy jetkizý jáne sýarý júielerin satyp alý shyǵyndarynyń 50%-yn óteý, nesieler men lizing boiynsha syiaqy mólsherlemesiniń 10%-yn sýbsidiialaý boiynsha sharalar qabyldandy. 2022 jylǵa qarai sýarmaly jerlerdiń kólemin 2 mln ga deiin jetkizý josparlanǵan. Buǵan qosa kúrish pen maqta siiaqty sýdy kóp talap etetin daqyldardyń alqaptaryn azaitý jumysy jalǵasady.
Fermerlerdiń ozyq jylyjai tehnologiialaryn engizýin yntalandyrý maqsatynda jabdyqtardyń tiisti júielerin jáne keshendi sheshimderdi satyp alýdy kózdeitin arnaiy investitsiialyq pasport ázirlendi. Jylyjai keshenderin salý jáne olardy keńeitý shyǵyndarynyń 30%-yn óteýmen investitsiialyq sýbsidiialar engizildi. Jylyjai óndirisi naryǵynyń kólemi 2,4 ese — 90 myń tonnadan 216,9 myń tonnaǵa deiin, al jylyjai sharýashylyqtarynyń aýdany 2,1 ese — 575,9 ga-dan 1236,7 ga deiin ulǵaidy.
Qazirgi tańda 180,1 mln ga jaiylym jerleriniń 106,2 mln ga (59%) jeri sýlandyryldy. Jaiylym jerlerin damytýdy yntalandyrý úshin sýlandyrý infraqurylymyn qurý shyǵyndarynyń 80%-na deiin investitsiialyq sýbsidiialaý engizildi. 2014-2019 jyldar kezeńinde jaiylymdardy sýlandyrý úshin 5978 qudyq salyndy, al josparlanǵan kórsetkish — 3633.
«Ulttyq agrarlyq ǵylymi-bilim berý ortalyǵy» KEAQ bilim berý ortalyqtarynda jáne aldyńǵy qatarly aýyl sharýashylyǵy kásiporyndarynyń bazasynda AÓK damytýdyń barlyq baǵyttary, onyń ishinde «jasyl» aýyl sharýashylyǵy qaǵidattaryn engizý boiynsha 25 myńnan astam tyńdaýshynyń qatysýymen 1400-ge jýyq seminar ótkizildi.
Otyrysqa qatysýshylar qaldyqtardy basqarý júiesin jaqsartý, jańartylatyn energiia kózderin damytý, eldi mekenderdi gazdandyrý jáne «taza» kólikti damytý arqyly aýanyń lastanýyn tómendetý máselelerin qarady.
Keńes Nur-Sultan jáne Almaty qalalarynyń ekologiialyq problemalaryn keshendi túrde sheshý jónindegi jol kartasynyń jobasyn bekitti. Qujat Almaty qalasynyń 2-JEO men 3-JEO jańǵyrtýdy, Nur-Sultan qalasynyń 1-JEO men 2-JEO-ǵa jetkizýshi gaz qubyrlaryn salýdy, sý jylytatyn jáne energetikalyq qazandyqtardy gazǵa aýystyrýdy, aǵashtardy kesýge qatysty ruqsat berý rásimderin kúsheitýdi, jasyl jelekter alańyn ulǵaitýdy, qoǵamdyq kólikti, kommýnaldyq qyzmet kólikterin gazǵa jáne elektr energiiasyna aýystyrýdy, sondai-aq basqa da sharalardy qarastyrady.
