Túrkistan oblysynyń Kentaý qalasyna qarasty Shornaq aýylyndaǵy jaǵdai turaqtaldy. Bul týraly oblystyq Politsiia departamenti resmi málimet taratty, dep habarlaidy "Ult aqparat".
Buǵan deiin áleýmettik jelide bir top azamat ózderiniń narazylyǵyn bildirgen beinejazba taralǵan bolatyn. Atalǵan oqiǵa Kentaý qalasyna qarasty Shornaq aýylynda bolǵan turmystyq janjaldy jergilikti politsiia qyzmetkerleri toqtatqan edi.
Oblystyq PD baspasóz qyzmetiniń málimetinshe, oqiǵa ornyna birinshi bolyp kelgen Kentaý qalalyq PB-niń ýchaskelik politsiia inspektory janjaldy toqtatý áreket jasaǵan. Politsiia qyzmetkeri alǵan jaraqatyna jáne azamattardyń qarsylyǵyna qaramastan óz mindetin atqaryp, kúsh pen atys qarýyn qoldanýǵa jol bermegen. Ýchaskelik politsiia inspektory men úsh aýyl turǵyny laqtyrylǵan tastan jaraqat alǵan. Olarǵa meditsinalyq kómek kórsetilgen.
Al, kelesi kúni Shornaq aýylyna jinalǵandar jaqyn mańdaǵy aýyl turǵyndaryn zańǵa qaishy áreketter jasaýǵa shaqyrǵan. Atalǵan jaitty politsiia qyzmetkerleri birden toqtatty. Aýyl turǵyndarymen oblystyń qoǵamdyq jáne ákimdik ókilderi kezdesti.
«Júrgizilgen izdestirý is-sharalary barysynda kriminaldyq politsiia qyzmetkerleri 4 azamatty anyqtap, ustady. Onyń 2-eýi sottyń sheshimimen qamaýǵa alyndy. Qazirgi ýaqytta oryn alǵan oqiǵanyń tolyq mán-jaiy anyqtalýda. Buzaqylyq faktisi boiynsha sotqa deiingi tergeý amaldary júrgizilýde» delingen habarlamada.
