Óńirler arasyndaǵy jyl saiyn júrgiziletin «Biznesti júrgizý jeńildigi» reitinginiń sońǵy qorytyndylary boiynsha Túrkistan oblysy ekinshi jyl qatarynan úzdik óńir bolyp tanyldy. Bul reiting 50% statistikalyq kórsetkishterden, 50% kásipkerlermen júrgizilgen saýalnama kórsetkishterden turady. Túrkistan oblysynda kásipkerliktiń sany artyp, 160 myńǵa jetti. Aldyńǵy qatarda. Oblys agrarlyq ólke bolǵandyqtan, kásipkerliktiń basym bóligi osy salada qyzmet etedi. Saýda, týrizm, qyzmet kórsetý jáne óndiris salalarynda qarqyndy damyp keledi. Bul týraly oblys ákimdiginiń baspasóz qyzmeti habarlady.
Túrkistan oblysynyń ákimi Darhan Satybaldynyń tóraǵalyǵymen ótken aptalyq apparat otyrysynda shaǵyn jáne orta kásipkerlikti qoldaý jáne damytý týraly baiandaldy. Biznesti qoldaý boiynsha memlekettik baǵdarlamalar kásipkerler úshin qoljetimdi Memlekettik baǵdarlamalardy kásipkerlerge túsindirý jáne biznesti osy baǵdarlamalarǵa qatystyrý úshin turaqty túrde aýdan jáne qalalarda seminar-kezdesýler ótkizilýde. Nátijesinde baǵdarlamalarǵa qatysýshylar sany artqan. Shaǵyn kásipkerlikti ary qarai damytý úshin oblys ákimine birneshe jańa joba usynyldy. Óńir basshysy Darhan Satybaldy olardy jan-jaqty saraptaýdy tapsyrdy.
«Qarapaiym zattar ekonomikasymen» qosa «Biznestiń jol kartasy 2025» baǵdarlamasy kásipkerler arasynda suranysqa ie. Biyl baǵdarlama biýdjeti 57%-ǵa artyp 9,6 mlrd. teńgege jetti. Nesielerdi sýbsidiialaý arqyly 12,7 mlrd. teńgege kásipkerler jeńildetilgen 6%-ben nesielendi. Sonymen qatar 5,5 mlrd. teńgeni quraityn nesieler «Damý» qory arqyly kepildendirildi. Biýdjetten bólingen qarjy sheńberinde kásipkerlerdi jyl sońyna deiin 25 mrld. teńgege nesieleý múmkindigi bar.
Investitsiia tartý jumystary oblys ákiminiń erekshe baqylaýynda. Oblysqa tartylǵan biylǵy investitsiia kólemi 773 mlrd. teńgege jetpek. Jekelei investitsiia tartýdyń qarqynyn arttyryp, belgilengen jospardy júzege asyrý úshin aýdan, qala ákimderi jumysty kúsheitýi tiis. Oblys ákimi bul baǵyttaǵy jumystardyń jańa tetigin engizip, negizgi kapitalǵa quiylatyn investitsiialar boiynsha nysanaly indikatorlardy oryndai almaǵandar basshylyq ornyn bosatýǵa daiyn bolýy tiis ekenin eskertti.
«Investitsiia tartýdy jandandyrý kerek. Aldaǵy jyldarǵa naqty meje bekitilgen. Sol jumystarǵa bar kúshti salyńyzdar. Qol qýsyryp otyratyn bolsaq, búkil jumysymyz biýdjetke qarap qalady. Jalpy ivestitsiia ósimin oryndaý – basty maqsat. Tapsyrylǵan árbir indikator oryndalýǵa tiis», – dedi D.Satybaldy.
