Túrkistan halyqaralyq dárejedegi týristik ortalyqqa ainalmaq. Bul týraly «Nur Otan» partiiasy Tóraǵasynyń birinshi orynbasary Baýyrjan Baibek Instagram-daǵy óz paraqshasynda jazdy.
«Kúni keshe Elbasy, «Nur Otan» partiiasynyń Tóraǵasy Nursultan Nazarbaev Túrkistan qalasynda bolyp, birqatar jańa nysandardy aralady. Elbasynyń Túrkistan oblysyn quryp, onyń ortalyǵy etip Túrkistan qalasyn belgileýi – tarihymyzdaǵy aitýly oqiǵa.
Bul bile bilsek, tutas túrki álemine kórsetilgen qurmet, babalar rýhyna taǵzym. Elbasynyń ózi bir sózinde Túrkistan – túgel túrkiniń basty ordasy ekenin tilge tiek etti. Bul óńirdiń týristik áleýetin kóteredi. Sonymen qatar osy jumystardyń barlyǵy – áleýmettik máseleleri shielenisken, halqy tyǵyz ornalasqan Túrkistan óńirin túletýge jasalyp jatqan úlken qadam.
Túrkistannyń toǵyz joldyń toraby retinde de múmkindigi zor. Kórshiles Ózbekstanmen jasasqan kelisimge orai Túrkistan, Tashkent, Samarqand, Buhara jáne Horezm oblystaryndaǵy týristik oryndarǵa birlesken týristik marshrýt ashylmaq. Sonyń nátijesinde Túrkistan tas jolmen, áýejaimen qamtylǵan, energetikalyq turǵydan derbes, gaz qubyrlary tartylǵan óńir bolmaq. Osynyń barlyǵy tek qana tarihqa taǵzym bolyp qana qoimai, jalpy óńirdiń áleýmettik múmkindikterin ósirýge qolqabys etedi.
Osylaisha, barsha túrkiniń basty ordasy, Qazaq handyǵynyń rýhani ortalyǵy, ejelgi astanamyz – Túrkistan túlep jatyr. Al, óz aldyna respýblikalyq mańyzy bar qala mártebesin alǵan Shymkent shahary damýǵa serpin alyp qana qoimai, ońtústik óńirde taǵy da bir úlken, álemdik dárejedegi ortalyq boi kóterýde. Bul – Elbasynyń eren eńbegi.
Jańa mártebe alǵaly beri kóne qala alyp qurylys alańyna ainaldy. Tarihi qalanyń keskin-kelbeti adam tanymastai ózgerip, eńsesi kóterildi. Elbasy sapar barysynda jańa nysandardyń ashylý rásimderine qatysty. Onyń biri – jylyna 3 mln. jolaýshy ótkizýge qabiletti biregei halyqaralyq áýejai.
Iri nysandardyń ishinde – 7000 oryndyq «Túrkistan-Arena» stadiony, 1000 oryndyq «Kongress Holl» kópfýnktsionaldy kontsert zaly, «Alataý media-ortalyǵy», «Uly dala eli», Vizit ortalyqtary, mýzeiler jáne teatrlar bar. Shahardaǵy barlyq qurylys Iýnesko tarapynan Iasaýi kesenesine qoiylatyn talaptarǵa sai, iaǵni keseneniń eńsesin túsirmeitindei etip salynýda.
Jalpy Túrkistan óńiri qazirgi tańda túlep jatyr. Birligi bekem, yntymaǵy jarasqan el. Bul keshegi Arys oqiǵasy kezinde de kórindi. Kóktemde sý basýdan zardap shekken Maqtaaral jaǵdaiynda da baiqaldy.
«Nur Otan» partiiasy jarylystan zardap shekken Arys qalasy turǵyndaryna #BizBirgemiz respýblikalyq aktsiiasy aiasynda 600 mln. teńgeden astam gýmanitarlyq kómek kórsetti. Maqtaral aýdanyndaǵy tótenshe jaǵdai kezinde de, indet órshigen tústa da barynsha qol ushyn sozdy.
Pandemiianyń saldarynan oryn alyp jatqan daǵdarysqa qaramastan, ejelgi qala – Túrkistan qaryshtap damyp jatyr. Bul – bereke-birliktiń arqasy», - dep jazdy B.Baibek.
