Búgin Túrkistan oblysynda alǵash ret «GASTRO FEST TURKISTAN – 2022» aýqymdy festivali ótti.
Oblys ortalyǵynda ótken is-sharaǵa Túrkistan oblysy ákiminiń orynbasary Sáken Qalqamanov qatysyp, festival aiasynda halyqaralyq týrizm kúnine bailanysty sala qyzmetkerlerin Alǵys hattarmen marapattady.
Gastrofestival – Túrkistan qalasynyń kórneki belgisine ainalatyn, óńirdegi qoǵamdyq tamaqtandyrý salasyn damytýǵa jáne gastronomiialyq brendin qalyptastyrýǵa úles qosý maqsatynda uiymdastyrylǵan aimaqtaǵy aýqymdy aspazdyq shara.
Qalanyń 25-ten astam mekemesi gastrofest qonaqtaryna ulttyq, jergilikti jáne kóshe taǵamdaryn, desertter men sýsyndar daiyndady.
Festivaldiń airyqsha ereksheligi – avtorlyq retsept boiynsha daiyndalǵan kóshe taǵamdary formatyndaǵy dástúrli taǵamdar usynyldy. Festival mázirinde qonaqtar qaita oilastyrylǵan álemdik hitterdi de synap kórdi.
«Jergilikti halyqtyń gastronomiialyq ónerin nasihattaýǵa baǵyttalǵan festival óńirimizdiń sheber aspazdarynyń dástúrin jalǵastyrýǵa oń serpin berý maqsatynda uiymdastyrylýda», - dedi oblys ákiminiń orynbasary Sáken Qalqamanov quttyqtaý sózinde.
«Jibek joly» saiabaǵyndaǵy is-sharaǵa 2 myńnan astam qonaq qatysty. Gastrofestival aspazdardyń kontsertteri, oiyndary, konkýrstary, sheberlik synyptary bar bai mádeni baǵdarlamamen jalǵasty.
Sondai-aq «Open Turkistan» týristik aqparattyq ortalyǵy is-shara barysynda Túrkistannyń alǵashqy gastrokartasyn tanystyrdy. Kartada týristerge barýǵa usynylǵan qala mekemeleri týraly aqparat bar. Bul kartadan, mysaly, naǵyz túrkistandyq samsany, Ońtústik kebabyn, qazaq taǵamdarynyń kóne retsepterimen ázirlengen taǵamdardy nemese jergilikti fast-fýdty qaidan kórýge bolatynyn bilýge bolady.
Gastrokarta týristerge arnalǵan nusqaýlyq qana emes, sonymen qatar meiramhanalar men kafelerge barý úshin jeńildik kýpondarynyń jinaǵy. Barlyq kýpondar jyl sońyna deiin jaramdy.
Aita ketsek, gastrofestival qorytyndysy boiynsha Túrkistan oblysy ákiminiń orynbasary festivaldiń jyl saiyn dástúrge ainalatynyna senim bildirdi.
