Túrkistan qalasyndaǵy áýejaida tek tehnikalyq ashylý bolǵan. Resmi ashylý saltanaty kelesi jyldyń basyna josparlanyp otyr. Bul týraly oblys ákiminiń orynbasary áleýmettik jelidegi tikelei efir kezinde málimdedi, dep habarlaidy "Ult aqparat".
Sáken Qalqamanovtyń sózinshe, jańadan salynyp jatqan áýejaidyń basty terminaly men ushyp-qoný jolaǵy daiyn.
«Qazir áýejaidaǵy qural-jabdyqtar men ǵarysh navigatsiiasyn ornatý men ózge de qurylys jumystary júrip jatyr. Áýejai tolyq ashyldy nemese erteń sol jerden ushaq usha bastaidy degen málimdeme bolǵan joq»,- dedi oblys ákiminiń orynbasary.
Aita keteiik, áleýmettik jelilerde keibir azamattar Túrkistan áýejaiynyń resmi ashylýy bolǵanymen iske qosylmaǵan degen syn aitqan bolatyn.
Tikelei efir barysynda Sáken Qalqamanov sondai-aq, Túrkistan qalasyn gazben qamtý máselesine de toqtalyp ketti.
«Kógildir otyn Túrkistan qalasyna kelgen. Búkil qalanyń ishine gaz qubyrlary tartylǵan. Sol qubyrlarǵa turǵyndar endi qosylýy kerek. Ol úshin «Ońtústik gaz aimaq» kompaniiasyna tiisti tólemer tólese bolǵany. Gazǵa qosylý 89 myń teńgeden bastalady. Qazir qala ákimdigi men oblystyq turǵyn úi kommýnaldyq sharýashylyq basqarmasynyń mamandary turǵyndar arasynda túsindirme jumystaryn júrgizýde», - dedi oblys ákiminiń orynbasary.
